पत्रकार हत्या र सञ्चारमाध्यम माथिको आक्रमणविरुद्ध चितवनमा शान्तिपूर्ण विरोध प्रदर्शन

चितवन । पत्रकार सुरेश रजकको हत्या र सञ्चार माध्यमहरूमाथि आक्रमणको नेपाल पत्रकार महासङ्घ चितवन शाखाले विरोध जनाएको छ ।

राजावादीले शुक्रवार काठमाडौँमा आयोजना गरेको हिंसात्मक प्रदर्शनको क्रममा एभिन्युज टेलिभिजनमा कार्यरत रजकलाई आगजनी भएको घरमा थुनेर हत्या गरिएको थियो । रजकको शव जलेको अवस्थामा फेला परेको थियो । राजावादीहरूले अन्नपूर्ण पोष्ट, कान्तिपुर टेलिभिजन लगायत विभिन्न सञ्चारमाध्यम र पत्रकारहरूमाथि पनि आक्रमण गरेका थिए ।

पत्रकार र सञ्चारमाध्यममाथि राजावादीले निशाना बनाएकोमा पत्रकार महासङ्घको केन्द्रीय सर्कुलर अनुसार चितवनमा शान्तिपूर्ण विरोध प्रदर्शन गरिएको हो । महासङ्घको स्थापना दिवसको अवसरमा पूर्वनिर्धारित कार्यक्रमहरू स्थगित गरी महासङ्घले विरोध कार्यक्रम गरेको हो ।

घटनाको विषयमा पत्रकार महासङ्घ चितवन शाखाको कार्यालयदेखि चौविसकोठीसम्म प्रदर्शन गरिएको थियो । प्रदर्शनपछि आयोजित सभालाई सम्बोधन गर्दै नेपाल पत्रकार महासङ्घका केन्द्रीय सदस्य एवम् चितवन शाखाका सल्लाहकार नारायण अधिकारीले घटनाको दोषीलाई तत्काल पक्राउ गरी कारबाही गर्न माग गरे ।

नेपाल पत्रकार महासङ्घ बागमती प्रदेशका महासचिव एवम् चितवन शाखाका सल्लाहकार राधेश्याम खतिवडाले पत्रकार र सञ्चारमाध्यम माथिको आक्रमण अक्षम्य अपराध भएको बताए ।

नेपाल पत्रकार महासङ्घ चितवन शाखाका अध्यक्ष बसन्त पराजुलीको अध्यक्षतामा भएको विरोध कार्यक्रममा प्रेस चौतारी नेपाल बागमती प्रदेशका अध्यक्ष तिलकराम रिमाल, नेपाल प्रेस युनियन चितवनका अध्यक्ष अनिल ढकाल, समाजवादी प्रेस सङ्गठनका अध्यक्ष टिकादत्त तिमिल्सना लगायतले घटनाको विरोध गर्दै अराजक तत्त्वलाई कारबाहीको माग गर्नुभएकाे छ ।

उनीहरूले पत्रकार रजकप्रति श्रद्धाञ्जली व्यक्त गर्दै घाइतेहरूको स्वास्थ्यलाभको कामना गरे । पत्रकारको जिउधनको सुरक्षा एवम् मृतक पत्रकार रजकलाई न्याय दिलाउन महासङ्घले निरन्तर सङ्घर्षका कार्यक्रम गर्न उनीहरूको सुझाव छ ।

विरोध प्रदर्शनमा ‘पत्रकार सुरक्षाको ग्यारेन्टी गर’, ‘पत्रकार सुरेश रजकको हत्यारालाई कारबाही गर’, ‘प्रेस स्वतन्त्रता कायम गर’, ‘स्ट्याण्डस फर प्रेस प्रिडम’ र ‘पत्रकारमाथिको दमन बन्द गर’ लेखिएका पर्चा पत्रकारले बोकेका थिए ।

राजावादीको प्रदर्शनलाई उत्तेजित बनाउने रवीन्द्र मिश्र, धवलशमशेर राणा, स्वागत नेपाल लगायतलाई प्रहरीले पक्राउ गरिसकेको छ । हिंसात्मक प्रदर्शनको कमाण्डर दुर्गा प्रसाईँ भने फरार छन् ।