बाँकेका स्थानीय तहबीच विपद् व्यवस्थापनका लागि साझा समझदारी

नेपालगञ्ज । बाँकेका स्थानीय तहहरुले विपद् व्यवस्थापनका लागि साझा समझदारीपत्रमा हस्ताक्षर गरेका छन् । 

जिल्लाभित्रका आठ स्थानीय तहहरूबिच विपद् जोखिम न्यूनीकरण र व्यवस्थापनको क्षेत्रमा प्रभावकारी रूपले कार्य गर्नको लागि समन्वय, सहकार्य र स्रोत साझेदारीलाई प्रबद्र्धन गर्ने समझदारी भएको छ । आपतकालीन कार्य सञ्चालन केन्द्रका सूचना व्यवस्थापन अधिकृत रुपन ज्ञवालीका अनुसार स्थानीय तहबीच विपद् व्यवस्थापनमा अन्तरपालिका समन्वय, सहकार्य एवम् अनुभव आदानप्रदान सम्बन्धि अन्तरपालिका समन्वय बैठकबाट विपद् व्यवस्थापन सम्बन्धमा साझा समझदारीपत्रमा हस्ताक्षर गरिएको हो ।

११ बुँदे समझदारीपत्रमा विपद् व्यवस्थापनको क्षेत्रमा स्थानीय तहमा भएका असल अभ्यास र सिकाइहरू आदानप्रदान गर्ने तथा आवश्यक परेको खण्डमा एक स्थानीय तहले अर्को स्थानीय तहलाई मानवीय, आर्थिक तथा प्राविधिक सहयोग गर्ने, विपद् व्यवस्थापन सम्बन्धि पूर्व तयारी तथा प्रतिकार्य सम्बन्धि तालिममा अन्य स्थानीय तहको समेत सहभागिता हुने गरी कार्यक्रमको व्यवस्था मिलाउने, विपद् व्यवस्थापनमा सहयोग आदानप्रदान गर्न तथा सहकार्य गर्न स्रोत साझेदारीको लागि सम्बन्धित स्थानीय तहको मौजुदा कानुन अद्यावधिक गर्ने लगायत विषय समेटिएको छ । नेपालगञ्ज उपमहानगरपालिका प्रमुख प्रशान्त विष्टको अध्यक्षतामा आज सम्पन्न बैठकमा सबै पालिकाले विपद् पूर्व तयारी तथा व्यवस्थापनका क्षेत्रमा गरिरहेका कामका बारेमा जानकारी गराएका थिए ।

समझदारीपत्रमा आगलागीको समयमा कुनै स्थानीय तहले दमकल सेवा माग गर्दा तुरुन्त उपलब्ध गराउनुपर्ने, एम्बुलेन्सहरूको विवरण अद्यावधिक गरी आपत् तथा विपद्को समयमा तुरुन्त सेवा दिने प्रबन्ध मिलाउने, विपद सूचना प्रणालीलाई प्रभावकारी बनाउन सबै स्थानीय तहले आपतकालीन कार्यसञ्चालन केन्द्र स्थापना गरी विपद् व्यवस्थापनलाई प्रभावकारी बनाउने, विपद् व्यवस्थापन कोषको व्यवस्था गरी आवश्यकता अनुसार विपद् व्यवस्थापनको क्षेत्रमा स्रोत परिचालन गर्ने बुँदाहरू उल्लेख गरिएको छ । 

यसैगरी विपद्को समयमा आवश्यक पर्ने उद्धार, राहत तथा पुनःस्थापनाको लागि आवश्यक खाद्यान्न, लत्ताकपडा, स्वास्थ्य सेवा, अस्थायी आवास आदि जस्ता अत्यावश्यक सेवा तत्काल प्रदान गर्ने उद्देश्यले त्यस्ता सामग्रीहरूको निश्चित मात्रामा भण्डार गरिराख्ने तथा निजी क्षेत्रसँग समेत सहकार्य गर्ने, जिल्लाको हाइवे तथा सहरी क्षेत्रमा छाडा पशुचौपायाको समस्या व्यापक रहेकोले त्यस्ता छाडा चौपायाको व्यवस्थापनको लागि उपयुक्त स्थानको खोजी गरी सञ्चालनको मोडालिटीसहितको पूर्ण प्रतिवेदन तयार गरी आगामी बैठकमा पेश गर्न राप्तीसोनारी गाउँपालिकालाई जिम्मा दिने र नेपालगञ्ज उपमहानगरपालिका पश्चात् वर्णानुक्रम अनुसार सबै स्थानीय तहले प्रत्येक तीन तीन महिना (फागुन, जेठ, भदौ र मङ्सिर) मा बैठक आयोजना गर्ने समझदारीपत्रमा भनिएको छ ।

सहरी विपद् तथा भूकम्पीय पूर्व तयारी परियोजना (सुपर) को समन्वयमा सम्पन्न बैठकमा नेपालगञ्ज उपमहानगरपालिकाका विपद फोकल पर्सन दिपेन्द्र श्रेष्ठले नेपालगञ्जमा विपद् व्यवस्थापनका क्षेत्रमा हालसम्म भएका उपलब्धि र आगामी कार्ययोजनाबारे प्रस्तुतीकरण गर्नुभएको थियो । बैठकमा जिल्ला समन्वय समिति प्रमुख ज्ञानेन्द्र कुमार चौधरी, उपप्रमुख सीता कार्की, राप्तीसोनारी गाउँपालिकाका अध्यक्ष तप्त बहादुर पौडेल, नरैनापुर गाउँपालिका अध्यक्ष इश्तियाक अहमद शाह, सबै पालिकाका प्रमुख प्रशासकीय अधिकृतहरू, विपद् फोकल पर्सन लगायतको उपस्थिति थियो । बैठकको समापन गर्दै नेपालगञ्जका प्रमुख विष्टले विपद्को समयमा आपसी सहयोग र हातेमालो आवश्यक रहने भन्दै अन्तरपालिका समन्वयले विपद् विरुद्ध जुध्न आत्मबल प्रदान गर्ने बताउनुभयो । बैठकमा नेपालगन्ज उपमहानगरपालिका विपद तथा वातावरण समिति संयोजक समीर प्रताप सिंहले स्वागत मन्तव्य व्यक्त गर्नुभएको थियो । 

युरोपियन युनियनको सहयोगमा नेपालगञ्ज उपमहानगरपालिकामा सहरी विपद् तथा भूकम्पीय पूर्व तयारी परियोजना (सुपर) सञ्चालनमा रहेको छ । युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपालको प्राविधिक सहयोगमा नेपालगञ्ज उपमहानगरपालिकामा सञ्चालित सहरी विपद् तथा भूकम्पीय पूर्व तयारी परियोजना (सुपर) ले विपद पूर्व तयारी र प्रतिकार्यका लागि काम गरिरहेको छ ।