बाजुरामा तत्काल ब्लड बैङ्क स्थापना गर्न सर्वपक्षीय सहमति 

बाजुरा । बाजुरामा तत्काल ब्लड बैङ्क स्थापना गर्ने गरि सर्वपक्षीय सहमति  भएको छ । जिल्ला प्रशासन कार्यालय बाजुराको आयोजनामा बसेको सरोकारवाला निकायको छलफलमा यस्तो निर्णय गरिएको हाे।

ब्लड बैङ्क स्थापना गर्नका लागि सुदूरपश्चिम प्रदेश सरकार सामाजिक विकास मन्त्रालय र नेपाल रेडक्रस सोसाईटी बाजुराबिच २०८१ पुस २१ गते सम्झौता भएको थियो ।

सोमबार जिल्लाका सरोकारवाला निकायसँग गरिएको छलफलमा छिट्टै ब्लड बैङ्क स्थापना गर्ने निर्णय गरिएको प्रमुख जिल्ला अधिकारी मेघनाथ पाध्यायाले बताउनुभयो ।

बैठकले ब्लड बैङ्क स्थापनाका लागि  आवश्यकपर्ने रेफ्रिजेरेटर (फ्रिज) मर्मत गरी चालु गर्नका लागि स्वास्थ्य कार्यालयलाई अनुरोध गरिएको छ ।

ब्लड बैङ्क स्थापना गरी सञ्चालनमा ल्याउनका लागि आवश्यकपर्ने सामाग्री र कर्मचारीहरू जिल्ला अस्पताल, स्वास्थ्य कार्यालय बाजुरा र नेपाल रेडक्रस सोसाईटी बाजुराले एक आपसमा समन्वय गरी व्यवस्था मिलाउने जिम्मेवारी दिइएको छ ।

बैठकमा जिल्ला स्थित क्रियाशील राजनैतिक दलहरूका प्रतिनिधि,स्वास्थ्य क्षेत्रका,प्रमुख,सुरक्षा निकायका प्रमुख लगायत सरोकारवाला सबै पक्षको उपस्थिति रहेको थियो।

बाजुरामा ब्लड बैङ्क नहुँदा रगत अभाव हुने सुत्केरी महिला र अरू बिरामीका लागि निकै समस्या हुने गरेको छ।