बाँकेमा किशोरीलाई एचपीभी खोप लगाइने तयारी पुरा

बाँके । पाठेघरको मुखको क्यान्सरविरुद्धको एचपीभी खोप अभियानको तयारी बाँकेमा पूरा भएको छ । जनस्वास्थ्य कार्यालय बाँकेका प्रमुख अंगत बहादुर शाहीले माघ २२ गते पर्ने विश्व क्यान्सर दिवसको अवसर पारेर खोप लगाउन सुरु गर्ने बताउनु भयो । 

जनस्वास्थ्य कार्यालय बाँकेले एचपिभी खोप अभियान अन्तर्गत यस पटक ३६ हजार ९ सय ५० जनालाई खोप सेवा प्रदान गर्ने लक्ष्य लिएको छ । जसका लागि जिल्लामा ५ सय २४ वटा खोप केन्द्र स्थापना गरिएको बताउनु भयो ।

पाठेघरको मुखको क्यान्सरलाई जनस्वास्थ्य समस्याको रूपमा नरहने अवस्थामा पुर्‍याउन सरकारले सन् २०३० सम्म तीन वटा लक्ष्य निर्धारण गरेको छ । जसअनुसार १० देखि १४ वर्षसम्म उमेरका कम्तीमा ९० प्रतिशत किशोरीहरूलाई एचपीभी खोप दिने, ३० वर्षभन्दा माथिको उमेरका कम्तीमा १० प्रतिशत महिलाहरूको पाठेघरको मुखको क्यान्सरको परीक्षण गर्ने र पाठेघरको मुखको क्यान्सर निदान भएका कम्तीमा १० प्रतिशत महिलाको उपचार गरिने छ ।

उक्त उमेर समूहका किशोरीहरू प्रायः विद्यालयमा कक्षा ७ देखि १० मा अध्ययनरत हुन्छन् र विद्यालय बाहिर रहेका सो उमेर समूहलाई खोप नछुट्ने उद्देश्यले सरोकारवालाहरूसँग छलफल गरिएको जनस्वास्थ्य कार्यालय बाँकेका सूचना अधिकारी नरेश श्रेष्ठले जानकारी दिनु भयो । उहाँका अनुसार विद्यालय बाहिर बाँकेमा ७ हजार ६ सय ५४ किशोरी रहेका छन् ।

पाठेघरको क्यान्सरबाट मुक्त गराउन यो अभियान सञ्चालनमा ल्याएको डाक्टर राजन पाण्डेले बताउनु भयो ।  उहाँले भन्नुभयो, “महिलामा पाठेघर क्यान्सरको जोखिम अत्यधिक हुन्छ, क्यान्सर भएर अकालमा ज्यान गुमाउनुपर्ने अवस्थालाई अन्त्य गर्न खोप अभियान सञ्चालन गरिएकाले सबैलाई खोप लगाउन अनुरोध गर्दछौँ ।”