सवारी दुर्घटनामा मोटरसाइकलमा सवार महिलाको मृत्यु

भक्तपुर । भक्तपुरको मध्यपुर थिमि नगरपालिका–२ सानोठिमिस्थित दिव्यश्वरी प्लानिङमा भएको सवारी दुर्घटनामा मोटरसाइकलमा सवार महिलाको मृत्यु भएको छ । गत सोमबार क्षमादेवी ग्रुपको गोदाम नजिक मोटरसाइकल र कार ठक्कर खाँदा दुर्घटना भएको थियो ।

दुर्घटनामा भोजपुरको पात्लेपानी गाउँपालिका–६ घर भई पेप्सिकोला बस्ने २३ वर्षिया सपना राईको मृत्यु भएको हो । उपचारका क्रममा बुधवार साँझ उनको निधन भएको प्रहरीले पुष्टि गरेको हो । काठमाडौँ मेडिकल कलेज सिनामंगलमा उपचारको क्रममा सपनाको मृत्यु भएको जिल्ला प्रहरी परिसर भक्तपुरका निमित्त सूचना अधिकारी प्रहरी निरीक्षक टेकेन्द्र शर्मा पौडेलले जानकारी दिनुभयो ।

मृतक सपनाकी ३ वर्षिया छोरी ईश्वरी राई डिस्चार्ज भइसकेकी प्रहरीको भनाइ छ । दुर्घटनामा संलग्न दुवै सवारी साधन र कार चालक रामेछाप सुनापाती गाउँपालिका–१ घर भई हाल बुढानिलकण्ठ बस्ने ३४ वर्षीय कृष्ण प्रसाद गौतमलाई प्रहरी वृत्त थिमिमा राखी थप अनुसन्धान भइरहेको प्रहरी निरीक्षक पौडेलले बताउनुभयो ।

बा. प्र. ०१–०२७ च.९२७ नं. को कारलाई सोही दिशातर्फ जाँदै गरेको बा. ५० प. ७४१ नं. को मोटरसाइकलले ठक्कर दिएको थियो ।

मोटरसाइकल मृतक सपनाका श्रीमान् वर्ष २९ का राजु राईले चलाएका थिए ।