रास्वपा सभापति रुपन्देहीमा, बुधबार अदालतमा हाजिर हुने

रुपन्देही । राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछाने मङ्गलवार रुपन्देहीको भैरहवा आइपुग्नुभएको छ । उहाँ त्रिभुवन अन्तर्राष्ट्रिय विमानस्थल हुँदै भैरहवा पुग्नुभएको हो । बुद्ध एयरको विमानमार्फत मङ्गलवार दिउँसो आएको रास्वपा लुम्बिनी प्रदेश सदस्य बिनोद खरेलले बताउनुभयो ।

भैरहवामा पार्टी सभापति लामिछानेले नेता कार्यकर्तासँग भेटघाट गर्नुभएको पार्टीका युवा नेता जीत बहादुर गुप्ताले बताउनुभयो । रास्वपा सिद्धार्थनगरका निवर्तमान सभापति सुमन न्यौपानेका अनुसार भैरहवाको देवकोटा चोकस्थित मेरिगोल्ड होटलमा उहाँ बस्नुहुनेछ ।

रास्वपा स्रोतका अनुसार बुधबार (भोली) लामिछाने रुपन्देही जिल्ला अदालत हाजिर हुने तयारी छ ।

लामिछानेविरुद्ध बुटवलको सुप्रीम सहकारीको बचत ठगी आरोपमा आइतबार रुपन्देही अदालतमा पूरक दर्ता भएको थियो । लामिछाने, छविलाल जोशी, जीबी राईसहित पूरक अभियोगका १४ र सुरु मुद्दाका २८ गरी ४२ जनाविरुद्ध जिल्ला अदालतमा मुद्दा दर्ता भएको थियो ।