ट्याक्टर दुर्घटनामा एक जनाको मृत्यु 

सुर्खेत । हुम्लाको चंखेली स्थित बोहराबाडामा  ट्याक्टर दुर्घटना हुँदा १ जनाको मृत्यु भएको छ भने अन्य ३ जना घाइते भएका छन् ।

दुर्घटनामा परी चंखेली गाउँपालिका १ का ३५ वर्षीय तुल्या बोहराको मृत्यु भएको जिल्ला प्रहरी कार्यालय हुम्लाले जनाएको छ । चंखेली गाउँपालिका–३, लोतीबाट नुन बोकेर आउँदै गरेको लु४त–७७२० नम्बरको ट्याक्टर दुर्घटना भएको थियो ।

प्रहरीका अनुसार दुर्घटनामा परी चंखेली गाउँपालिका–१, का ४० वर्षीय मानबहादुर बोहरा, सोही वडाका ४५ वर्षीय धना बोहरा र १० वर्षिया चरी बोहरा घाइते भएका छन् । चंखेली गाउँपालिकाले खर्च व्यहोर्ने गरी हेलिकप्टरबाट घाइतेहरूको उद्धारका लागि गृहमन्त्रालयमा पत्राचार गरिएको हुम्लाका प्रमुख जिल्ला अधिकारी नारायण पाण्डेले जानकारी दिनु भयो ।