देवघाटमा लाग्ने माघेसंक्रान्ति मेलाको तयारी पुरा

चितवन । पवित्र धार्मिक स्थल देवघाटधाममा भोलि माघे संक्रान्ति मेला लाग्दै छ । मेलामा सहभागी हुन चितवन लगायत देशका विभिन्न जिल्ला र भारतबाट समेत तीर्थयात्रीहरू  आउने क्रम जारी छ । माघे सङ्क्रान्तिका दिन देवघाटको वेणी सङ्गममा स्नान गर्ने भक्तजनको ठूलो भिड लाग्ने गर्छ ।

माघे संक्रान्ति मेलालाई सुरक्षित र व्यवस्थित बनाउनका लागि चितवन र तनहुँतर्फ सबै तयारी पुरा भएको देवघाट क्षेत्र विकास समितिले बताएको छ । समितिले आज (सोमवार) पत्रकार सम्मेलनको आयोजना गरि मेला व्यवस्थापन बारे जानकारी दिएको हो ।

मेलालाई सहजताको लागि व्यवस्थित र मर्यादित बनाउन  देवघाट क्षेत्र विकास समितिका अध्यक्ष भिम बहादुर रानाको संयोजकत्वमा १५१ सदस्यीय माघे संक्रान्ति मेला व्यवस्थापन मुल समिति गठन गरिएको छ ।

चितवन र तनहुँ जोड्ने झोलुङ्गे पुलको मर्मत गर्ने काम सम्पन्न भएको छ भने तीर्थस्थलमा मासु र मदिरा निषेध गरिएको छ । डुङ्गामार्फत नदी पार गर्न चाहने भक्तजनको लागि डुङ्गामा सयर गर्दा एकतर्फी प्रतिव्यक्ति ५० रुपैयाँ भाडादर तोकिएको छ ।

मेलामा जाने सवारी साधनहरू आँपटारी–रामनगर र रामनगर–ठिमुरा हुँदै देवघाट प्रवेश गर्ने छन् भने बागीश्वरी हुँदै आँपटारी निस्कने व्यवस्था मिलाइएको माघे संक्रान्ति मेला व्यवस्थापन मुल समितिका संयोजक रानाले बताए । उनका अनुसार मेलालाई सुरक्षित र व्यवस्थित गर्न १६० जना स्वयंसेवक र ५०० जना सुरक्षाकर्मी परिचालन गरिने अध्यक्ष रानाले जानकारी दिनुभयो ।

पर्याप्त मात्रा अस्थायी शौचालय र सिताराम संस्कृत माविको परिसरमा पार्किङको व्यवस्था मिलाइएको छ । साइकलको १०, मोटरसाइकलको २०, कार/जीप/भ्यानको ५० र बस/ट्रकको पार्किङ शुल्क १०० रुपैयाँ निर्धारण गरिएको छ । आँपटारी–रामनगर–देवघाट र आँपटारी–रामनगर–ठिमुरा–देवघाट सडक मर्मतको काम सम्पन्न उहाँको भनाई छ  ।