इन्डो नेपाल भलिबल प्रतियोगिता: मणिमुकन्द क्लब अन्तिम चारमा

रुपन्देही । रुपन्देहीमा जारी मदन भण्डारी गोल्ड कप इन्डो नेपाल पुरुष भलिबल प्रतियोगिता पाँचौँ दिनको खेलमा मणिमुकन्द भलिबल क्लब अन्तिम चारमा स्थान बनाएको छ । 

आइतबार भएको निक्कै प्रतिस्पर्धात्मक खेलमा ३–२ को सेटमा पराजित गर्दै मणिमुकुन्द अन्तिम चारमा स्थान बनाएको हो । यसैगरी दोस्रो खेलमा गुजरात भलिबल क्लबले गल्कोट भलिबल क्लबलाई पराजित गरेको छ । गुजरातको यो प्रतियोगितामा दोस्रो जित हो ।

रामनगर खेलमैदानमा भएको पहिलो निक्कै प्रतिस्पर्धात्मक खेलमा मणिमुकुन्द भलिबल क्लबले २५–२० अङ्कसहित जित निकाल्दै खेलमा अग्रता लिएको थियो । तर दोस्रो सेट भने आयोजक मदन भण्डारीले २५–१८ मा आफ्नो पोल्टामा पार्दै खेल बराबरीमा ल्यायो । चर्चित युवा खेलाडीसहित मैदानमा उत्रेको आयोजक मदन भण्डारीलाई तेस्रो सेटमा २५–१२ अङ्कको साथ पराजित गर्दै मणिमुकुन्दले खेलमा फेरि अग्रता लियो । चौथौँ सेट भने खेलमा फर्किँदै आयोजक मदन भण्डारीले २५–२० अङ्कका साथ जित निकाल्दै खेल पुनः बराबरीमा ल्याउन सफल भयो । अन्तिम तथा निर्णायक सेट मणिमुकुन्दले १५–१२ अङ्कको जित निकाल्दै खेल आफ्नो पक्षमा पारेको थियो ।

यसैगरी दोस्रो खेलमा गुजरात भलिबल क्लबले विदेशी खेलाडीसहित मैदानमा रहेको गल्कोट भलिबल क्लबलाई ३–० को सेटमा पराजित गरेको छ । एकतर्फी खेलमा गुजरातले २५–१८, दोस्रो सेट २५–१९ र २५–१६ को सोझो सेटमा पराजित गरेको हो । सोमबार पहिलो खेलमा विभागीय टिम नेपाल पुलिस क्लबले रुकुम भलिबल क्लब तथा दोस्रो खेलमा विभागीय टिम त्रिभुवन आर्मी क्लब र सशस्त्र प्रहरी बल एपीएफ क्लबको सामना गर्नेछ ।