मृत अवस्थामा युवकको शव फेला 

बीरगंज । पर्सामा एक युवकको शव मृत अवस्थामा जङ्गलमा फेला परेको छ । 

पर्सागढी नगरपालिका वडा नम्बर–४ बस्ने राजदेव प्रसाद पटेलको छोरा बर्ष ४५ को ह«दयश पटेलको शव जङ्गलमा मृत अवस्थामा आज फेला परेको हो  । हिजो बिहान १० बजे खाना खाई साइकल लिएर जङ्गलमा दाउरा लिन गएका पटेल आज बिहान मृत अवस्थामा भेटिएको प्रहरीले जनाएको छ ।  

जङ्गल गएका पटेल हिजो साँझसम्म घर नफर्किएपछि साँझ देखि नै घरपरिवारले खोजी कार्य गरिरहेको थियो । आज बिहान स्थानीयहरू दाउरा लिन जङ्गल जाने क्रममा उनको शव देखेपछि स्थानीय प्रहरी चौकी बडनिहारलाई खबर गरेका थिए ।

बडनिहार प्रहरी चौकी र स्थानीयहरू घटना स्थलमा पुग्दा पटेल दाउरा साइकलमा लिएर आउने क्रममा ढोरियामाई जङ्गल क्षेत्रमा साइकल सहित लडेको अवस्थामा उनको शव फेला परेको थियो । उनको शरीरमा शङ्कास्पद कुनै चोटपटक र दाग नरहेको प्रहरीले जनाएको छ ।

शवको मुचुल्का उठाई पोष्टमार्टमका लागि नारायणी अस्पताल वीरगन्जमा पठाइएको ईलाका प्रहरी कार्यालय पटेर्वासुगौलिका प्रहरी निरीक्षक प्रकाश थापाले बताउनुभयो ।