दोस्रो संस्करणको भरतपुर मेयर्स कप आजबाट सुरु हुँदै

चितवन । दोस्रो संस्करणको भरतपुर मेयर्स कप अन्तर विद्यालय क्रिकेट प्रतियोगिता आजदेखि सुरु हुँदैछ ।

भरतपुर महानगरपालिकाको आयोजनामा गौतमबुद्ध अन्तर्राष्ट्रिय क्रिकेट रंगशालाको नमुना मैदानमा बिहान ९ः३० बजेदेखी प्रतियोगिता सुरु हुनेछ । प्रतियोगिताको भरतपुर महानगरपालिका प्रमुख रेनु दाहाल र नेपाल क्रिकेट संघ (क्यान)का सचिव पारस खडकाले संयुक्त रुपमा उद्घाटन गर्ने कार्यक्रम छ ।

प्रतियोगितामा सामुदायिक तथा संस्थागत गरी ४७ विद्यालयबीच प्रतिस्पर्धा हुँदैछ । फागुन दोस्रो सातासम्म चल्ने प्रतियोगितामा कुल ६१ खेल हुनेछ ।

उद्घाटन खेलमा आज भरतपुर माध्यमिक विद्यालय र चितवन माध्यमिक विद्यालयबीच प्रतिस्पर्धा हुनेछ । पहिलो चरणमा सामुदायिक विद्यालय र संस्थागत विद्यालयबीच छुट्टाछुट्टै छनोट खेल हुनेछ । त्यसबाट छनोट भएका टिमहरूबिच रातो बल अर्थात् दुई दिवसीय प्रतियोगिता हुनेछ ।

प्रतियोगिताको सह–आयोजकमा चितवन जिल्ला क्रिकेट संघ, भरतपुर महानगर क्रिकेट संघ, चितवन राइनोज रहेका छन् ।