स्कार्पियो दुर्घटना : एकको मृत्यु, तीनलाई थप उपचारका लागि काठमाडौँ पठाइयो 

भोजपुर । भोजपुरको वोखिममा स्कार्पियोे दुर्घटना हुँदा घाइते भएका एक जनाको मृत्यु भएको छ भने अन्य गम्भीर तीन घाइतेलाई थप उपचारका लागि काठमाडौँ पठाइएको छ । दुर्घटनामा परी १० जना घाइते भएका थिए ।

भोजपुरबाट टेम्कैमैयुङ गाउँपालिकाको चखेवा हिँडेको प्रदेश १–०२–००२ च ६९२३ नम्बरको स्कार्पियो बिहीबार बिहान भोजपुर नगरपालिका वडा नम्बर पाँच, बोखिममा दुर्घटना हुँदा १० जना घाइते भएका थिए । झापाको गौरादह नगरपालिका–७ का झम्कबहादुर घलेको मृत्यु भएको जिल्ला प्रहरी कार्यालय भोजपुरका सूचना अधिकारी प्रहरी निरीक्षक दीपक श्रेष्ठले जानकारी दिनुभयो । 

गम्भीर घाइते भोजपुर नगरपालिका–५ का लाक्पादिकी शेर्पा, सोही वडाका रामकुमार राई र सुनसरीको धरान उपमहानगरपालिका–२ का इहायाराना सुब्बालाई थप उपचारका लागि हेलिकोप्टर मार्फत केएमसी काठमाडौँ पठाइएको सूचना अधिकारी प्रहरी निरीक्षक श्रेष्ठले बताउनुभयो । अन्यको जिल्ला अस्पताल भोजपुरमा हाल उपचार भई रहेको छ ।