फाल्गुनन्द गोल्डकप : मच्छिन्द्र क्लब क्वाटरफाइनल प्रवेश 

पाँचथर । पाँचथरको फिदिममा सञ्चालन भइरहेको ११ औँ संस्करणको फाल्गुनन्द गोल्डकप फुटबल प्रतियोगितामा काठमाडौँको मच्छिन्द्र फुटबल क्लब  क्वाटरफाइनलमा प्रवेश गरेको छ ।

आइतबार फिदिम मा.वि.को खेलमैदानमा सम्पन्न खेलमा झापा एघार फुटबल क्लबलाई  ५–०  गोल अन्तरले पराजित गर्दै मच्छिन्द्र क्वाटरफाइनलमा पुगेको हो । मछिन्द्रका तर्फबाट देवेन्द्र तामाङ, उत्सव राई , सौरभ सुब्बा ले समान १/१ गोल र बिजु भुजेलले २ गोल गरे ।  खेलको म्यान अफ द म्याच मछिन्द्रका बिजु भुजेल हुँदै नगद १० हजार रूपैया प्राप्त गरे । हार सँगै झापा एघार प्रतियोगिताबाट बाहिरिएको छ । 

भोलि हुने पहिलो क्वाटरफाइनल खेलमा आयोजक फिदिम स्पोर्टिङ क्लब  र त्रिभुवन आर्मी क्लब बीच प्रतिस्पर्धा हुनेछ ।

फिदिम स्पोर्टिङ क्लबको आयोजनामा आगामी पौष १५ गतेसम्म हुने प्रतियोगिताको विजेताले नगद १० लाख ५ सय ५५ रुपैयाँ र उपविजेताले ५ लाख ५ सय ५५ रुपैयाँ पाउने आयोजकले जनाएको छ । यो पुरस्कार राशि जिल्लाकै सर्वाधिक हो । प्रतियोगिताको सर्वोकृष्ट खेलाडीले एक थान इभी स्कुटर प्राप्त गर्नेछन् । प्रत्येक खेलमा म्यान अफ दि म्याच हुने खेलाडीले नगद १० हजार पाउँदा सर्वाधिक गोलकर्ताले नगद १५ हजार पाउनेछन् । यसैगरी, उत्कृष्ट रक्षक, प्रशिक्षक, फरवार्ड, मिडफिल्डर, गोलरक्षक र उदयमान खेलाडीले समान १०/१० हजार प्राप्त गर्नेछन् ।