खेल्दै गरेका बालकको लडेर मृत्यु

मुगु । मुगु जिल्लाको छायाँनाथ रारा नगरपालिका–१४, बाम गाउँका अन्दाजी १० वर्षीय बालक किसान बढुवालको लडेर मृत्यु भएको छ।

सदरमुकाम गमगढीस्थित सोरु जाने बाटो नजिकै राजबहादुर भग्रीको तीनतले घरमा पृथ्वी बढुवालको परिवार भाडामा बस्दै आएको थियो। शनिबार साँझ करिब ४ बजे किसान आफ्ना भाइहरूसँग खेल्ने क्रममा घरको छतबाट खस्न पुगेका थिए। खसेपछि उनको टाउकोको बायाँ पट्टि गहिरो चोट लागेको जनाइएको छ।

घटनापछि उनलाई तत्कालै उपचारका लागि जिल्ला अस्पताल ठिनीमा लगिएको थियो। तर, गम्भीर चोटका कारण उपचारकै क्रममा उनको मृत्यु भएको जिल्ला प्रहरी कार्यालय मुगुले जनाएको छ।

हाल मृतकको शव जिल्ला अस्पतालको शव गृहमा राखिएको छ। आइतबार मृतकका आफन्त आएपछि पोस्टमार्टम प्रक्रिया अघि बढाइने अस्पताल स्रोतले जनाएको छ ।