चिसो बढेसँगै सुनसान रारा, पर्यटन व्यवसायी मर्कामा

मुगु । हिमाली क्षेत्रको चिसो बढेसँगै नेपालको प्रसिद्ध पर्यटकीय गन्तव्य रारा ताल सुनसान बन्न थालेको छ। चिसोका कारण पर्यटकको आगमन घट्न थालेपछि रारा क्षेत्रका होटेल र आसपासका रमणीय ठाउँहरू सुनसान जस्तै बनेका छन् ।

हिउँद लागे सँगै पर्यटकहरू दिन प्रतिदिन घट्दै गएपछि राराका पर्यटन व्यवसायीहरू हाल फुर्सदिला भएका छन् । दिनभर घाम तापेर बस्नुको विकल्प नरहेको रारा सल्लेरीका पर्यटन व्यवसायी शैलेन्द्र बमले बताउनुभयो ।

व्यवसायी बमका अनुसार पर्यटकहरूले चिसोमा खासै डराउनुपर्दैन । ‘जाडो सिजनमा यहाँका होटेलहरूमा आगो ताप्नको लागि क्याम्फायर कोठाहरू व्यवस्थित, हुने भएकाले हिउँदमा पनि रारा आउन कोही कसैले डराउनु पर्दैन ।’ बमले भन्नुभयो ।

रारा राष्ट्रिय निकुञ्जका वरिष्ठ संरक्षण अधिकृत महेश न्यौपानेका अनुसार चिसो मौसममा यहाँ आउने पर्यटकहरूको सङ्ख्या गत वर्षको तुलनामा निकै घटेको छ।

सरकारले चिसोमा समेत पर्यटक आकर्षित गर्नका लागि पूर्वाधार विकास र प्रचार-प्रसारलाई थप प्राथमिकता दिनुपर्ने आवाज स्थानीय व्यवसायीहरूबाट उठेको छ। चिसोका बाबजुद पनि राराको प्राकृतिक सौन्दर्यलाई अनुभव गर्न केही साहसी पर्यटकहरू भने फाटफुट रूपमा आइरहेका छन्।