रत्न राजमार्गमा फोर्स गाडी दुर्घटना हुँदा पाँच जना घाइते

सुर्खेत । कोहलपुर–सुर्खेत रत्न राजमार्गको देउराली नजिकै आज फोर्स गाडी दुर्घटना हुँदा पाँच जना घाइते भएका छन् । 

जुम्लाबाट नेपालगञ्जतर्फ जाँदै गरेको लु२ख–५७८५ नम्बरको फोर्स गाडी बाँकेको बैजनाथ गाउँपालिका–१, (१५ खोला मोडमा) टायर पड्किएर सडकमै पल्टिएर दुर्घटना हुँदा पाँच जना घाइते भएको ईलाका प्रहरी कार्यालय चिसापानीले जनाएको छ । 

प्रहरीका अनुसार घाइते हुनेमा बाँकेको कोहलपुर नगरपालिका–११, का गाडी साहु ४२ वर्षीय अलिबहादुर शाही, बर्दिया बासगढी नगरपालिका–१, की ३५ वर्षीया टिका घर्ती, जुम्लाको पतारासी गाउँपालिका–५, की ४४ वर्षीया सुशीला बुढा एवं सोही ठाउँकी ३१ वर्षिया अमकली बुढा र बर्दियाको बासगढी नगरपालिका–३, की २० वर्षिया गिता परियार रहेको ईलाका प्रहरी कार्यालय चिसापानीका प्रहरी हवल्दार कुल्पनाकुमारी शाहीले जानकारी दिनुभयो ।

उहाँका अनुसार घाइतेहरूको उद्धार गरी बाँकेको कोहलपुर मेडिकल कलेजमा उपचार भइरहेको छ । 

गाडी चालक र गाडीलाई प्रहरीको नियन्त्रणमा राखेर घटना बारे थप अनुसन्धान अगाडि बढाइएको उहाँको भनाइ छ ।