पाल्पामा ट्रक ठोक्किँदा चालकको मृत्यु, सहचालक घाइते 

पाल्पा।सिद्धार्थ राजमार्ग अन्तरगत पाल्पाको रम्भा–३, अघाँहाखोलामा दुई ट्रक एक आपसमा ठोक्किँदा  चालकको मृत्यु भएको छ । मृत्यु हुनेमा रम्भा गाउँपालिका–३,पाल्पाका २३ वर्षीय भुवनसिंह राना रहेको प्रहरीले जनाएको छ । त्यस्तै सहचालक स्याङ्जा वालिङ १० का सन्जित खवास थापा घाइते हुनुभएको छ ।

गए राती करिब ११ बजेको समयमा बुटवलबाट पोखरातर्फ जाँदै गरेको लु १ ख ५३५१ नम्बरको ट्रकको ब्रेक फेल भई सोही दिशातर्फ गइरहेको ना १ क ७१२१ नम्बरको ट्रकलाई ठक्कर दिएको थियो ।

दुर्घटनामा परी लु १ ख ५३५१ नम्बरको ट्रक चालक रानाको मृत्यु भएको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिनुभयो । रानाको लुम्बिनी मेडिकल कलेज प्रभासमा उपचारको क्रममा मृत्यु भएको हो । घाइते हुने ना १ क ७१२१ नम्बरको ट्रकका सहचालक हुन ।

घटनाबारे थप अनुसन्धान भइरहेको प्रहरीले जनाएको छ ।