नुवाकोटमा बाढीले सयौँ रोपनी धानखेत बगरमा परिणत

नुवाकोट । कोशी खोलामा आएको बाढीले नुवाकोटको तारकेश्वर गाउँपालिका–२ स्थित पिमलटारको सयौँ रोपनी धानखेत बगरमा परिणत भएको छ ।

नुवाकोट र धादिङको सीमा हुँदै बगेको कोशी खोलामा बुधबार आएको बाढीले पिमलटारस्थित फाँटमा पस्दा एक सय परिवार किसानको पाँच सय ५० रोपनीभन्दा बढी खेतमा लगाएको धानखेत (रोपो) पूरै क्षति गरेको हो ।

ग्रेगरसहितको लेदो बाढी धानखेतमा पसेर बगरमा परिणत बनाएको स्थानीय किसान आरबी नेपालले जानकारी दिनुभयो । उहाँको अनुसार किसानले असारमा रोपेको धानबालीमा केही दिनअघि रासायनिक मल राखेर हरियाली बनाएको रोपो अधिकांश नष्ट भएको छ ।

“बाढी रोकिएपछि रोपो उठाउन कोशिस गरेपनि ग्रेगर सहितको बालुवा र लेदोले पुरेकाले अधिकांश क्षति पुगेछ ।” उहाँले भन्नुभयो “दुई सय रोपनी खेतलाई क्षति पुर्‍याउँदै अहिले खोला बगिरहेको छ भने चार सय रोपनी खेतमा लगाएको रोपोलाई क्षति पुर्‍याएर बालुवा र ग्रेगर भरिएका छन् ।”

बाढीको कारण स्थानीय समाजसेवी जनक ढुङ्गानाले व्यक्तिगत लगानीमा केही वर्षअघि निर्माण गर्नुभएको झोलुङ्गे पुलमा समेत क्षति पुगेको छ । पुलको एकतर्फी पिल्लर बगाएसँगै पुलबाट आउजाउ गर्न नहुने भएको छ ।

त्यस्तै, स्थानीय किसान अरुण राईले व्यावसायिक रुपमा गर्दै आउनुभएको माछा खेतीको पोखरीमा पनि बाढी क्षति पुर्याएको छ । उहाँले पालन गरेको दश वटा पोखरीमा कोशाी खोला पसेर माछा प्रभावित बनाएको छ भने पोखरीमा ग्रेगर भरिएको छ ।

तारकेश्वर गाउँपालिका अध्यक्ष शिव अधिकारी (अविरल)ले क्षति पुगेको स्थानमा आवश्यक अनुगमन र क्षतिको लगत लिएर किसानलाई पुगेको नोक्सानप्रति सम्बोधन गर्ने जानकारी दिनुभयो ।

उहाँकाअनुसार थप क्षति हुन नदिन र अहिले पुगेको क्षतिको लगत सङ्कलन गर्न प्रभावित स्थानमा प्राविधिकलाई खटाइएको छ ।
“प्राविधिक प्रतिवेदन र स्थलगत अनुगमन गरेर पीडित किसानलाई राहत र तत्कालै पुनः खेती लगाउने विषयमा अध्ययन गर्नेछौ ।” पालिका अध्यक्ष अधिकारीले भन्नुभयो “आगामी दिनमा खोलालाई खेतमा पस्न नदिन आवश्यक संरचना बनाउनको लागी ध्यान दिनेछौ ।”