श्रीमान् श्रीमती कोठा भित्र मृत अवस्थामा फेला

दाङ। दाङको तुलसीपुरमा श्रीमान् श्रीमतीको शव फेला परेको छ । 

शनिवार बिहान तुलसीपुर उपमहानगरपालिका वडा नं ९ बेलुवामा कोठा भाडामा बस्दै आएका अन्दाजी २५ वर्षीय सुशील भण्डारी र अन्दाजी २१ वर्षीय पवित्रा डाँगी भण्डारीको शव फेला परेको प्रहरीले बताएको छ । 

सुशीलको शव झुन्डिएको अवस्थामा र पवित्राको शव बेडमा फेला परेको हो । पवित्राको टाउकोमा चोट र नाक, मुखबाट रगत निस्किएको प्रहरीले जानकारी दिएको छ। 

सल्यान त्रिवेणी गाउँपालिका वडा नम्बर ४ फलाबाङ घर भई भण्डारी दम्पती करिब डेढ महिना पहिले विवाह गरेर बेलुवामा कोठा भाडा लिई मजदुरी काम गर्दै आएको इलाका प्रहरी कार्यालय तुलसीपुरका प्रहरी निरीक्षक नवराज केसीले जानकारी दिनुभयो । 

प्रमुख केसीका अनुसार श्रीमान् श्रीमती विगत दुई दिनदेखि कोठा बाहिर ननिस्किएपछि छिमेकीले प्रहरीलाई खबर गरेका थिए । 

प्रहरी निरीक्षक केसीको कमान्डमा खटिएको प्रहरी टोलीले ढोका खोल्दा एक जनाको शव झुन्डिएको अवस्थामा र एक जनाको शव बेडमा फेला पारेको हो । श्रीमानले श्रीमतीको हत्या गरी आफूले पनि आत्महत्या गरेको प्रहरीको आशङ्का छ । घटनाको विषयमा थप अनुसन्धान भइरहेको प्रहरीले बताएको छ ।