भीरबाट लडेका वृद्धको सेनाको हेलिकप्टर मार्फत उद्धार

गोरखा । चुमनुव्री गाउँपालिका २ स्यो गोरखाका छेवाङ दोर्जी वृद्ध भत्ता लिन जाँदा भिरबाट लडेर अचेत अवस्थामा पुगेपछि नेपाली सेनाको हेलिकप्टरबाट आज उद्धार गरिएको छ ।

सोमबार लडेका वृद्ध दोर्जीको आज बिहान उद्धार गरिएको सांसद राजेन्द्र बजगाइले जानकारी दिनुभयो । ८० वर्षीय वृद्धको उद्धारका लागि तत्कालै पहल गर्दा समेत समय लागेको उहाँको भनाइ छ । वृद्धको अहिले त्रिवि शिक्षण अस्पतालमा उपचार भइरहेको बजगाइले बताउनुभयो । 

मनास्लु संरक्षण क्षेत्र भएकोले यस क्षेत्रलाई सरकारले निषेधित क्षेत्र घोषणा गरेको छ । गृह मन्त्रालयको अनुमति नलिई तत्कालै हेलिकप्टर उडाउन नपाइने अवस्था रहँदै आएको छ ।

निषेधित क्षेत्र खुला गर्न पटक पटक ताकेता गर्दा पनि सुनुवाइ नभएको चुमनुव्री गाउँपालिका अध्यक्ष निमा लामाले बताउनुभयो ।