पहिरोले सिद्धिचरण लोकमार्ग अवरुद्ध

ओखलढुंगा । ओखलढुंगाको भुसुने जङ्गलमा पहिरो खस्दा सिद्धिचरण लोकमार्ग अवरुद्ध भएको छ । बिहीबार देखिको अविरल बर्षाका कारण जिल्लाको मानेभन्ज्याङ गाउँपालिका–४ स्थित भुसुनेको जङ्गलमा आज शुक्रबार बिहान ६:३० बजे सडक माथिबाट पहिरो खस्दा सडक अवरुद्ध भएको हो । 

पहिरोका कारण अन्दाजी २५ मिटर सडक अवरुद्ध भएको जिल्ला प्रहरी कार्यालय ओखलढुंगाका सूचना अधिकारी एवम् प्रहरी निरीक्षक बालिस्टर सिंहले जानकारी दिनुभयो । 

पहिरोले सडक अवरुद्ध भएको क्षेत्रमा अस्थायी प्रहरी पोष्ट केतुकेबाट प्रहरी टोली खटिएको र अवरुद्ध सडक खुलाउनेबारे स्थानीय निकायसँग आवश्यक पहल भइरहेको प्रहरीले जनाएको छ ।

सडक अवरुद्ध भएपछि ओखलढुंगा र सोलुखुम्बुबाट राजधानी काठमाडौं र तराईका जिल्लाका लागि छुटेका सयौँ सवारी ओखलढुंगाको मिलनचोक रमाईलोडाँडा क्षेत्रमै रोकिएका छन् । 

निरन्तरको वर्षाका कारण जिल्लाभरका ग्रामीण सडकमा पहिरोको जोखिम बढेको छ । अधिकांश सडक अवरुद्ध छन् ।