कोशी प्रदेश सरकारको नीति तथा कार्यक्रम सार्वजनिक

विराटनगर । कोशी प्रदेश सरकारले आगामी आर्थिक वर्षका लागि आफ्नो नीति तथा कार्यक्रम सार्वजनिक गरेको छ । कोशी प्रदेश सभाको आज बसेको बैठकमा प्रदेश प्रमुख पर्शुराम खापुङले सरकारको नीति तथा कार्यक्रम सार्वजनिक गर्नु भएको हो ।

नीति तथा कार्यक्रममा शिक्षा, स्वास्थ्य, कृषि , पर्यटन, खानेपानी तथा विकास निर्माणलाई प्राथमिकतामा राखिएको छ । नीति तथा कार्यक्रममा कृषि क्षेत्रको व्यावसायिक प्रवर्धन तथा रोजगारमूलक कृषिलाई महत्त्व दिइएको छ ।

नीति तथा कार्यक्रममा गरिबी निवारण, सबल अर्थतन्त्रको निमार्ण स्वच्छ, सुखी र समुन्नत प्रदेशको निमार्ण, सञ्चार क्षेत्रको सुदृढीकरण, सञ्चारकर्मीको क्षमता अभिवृद्धि तथा प्रदेश र स्थानीय तहका रिक्त दरबन्दीमा कर्मचारी पदपूर्ति, विपद् जोखिम न्यूनीकरण एवं व्यवस्थापनका लागि जोखिम क्षेत्रको नक्सांकन तथा पूर्व सूचना प्रणालीको व्यवस्थापनमा जोड दिइएको छ । 

त्यस्तै समय अनुकूल कानुन निमार्ण, प्रदेश सरकारको मातहतमा रहेको सरकारी कार्यालयबाट दिइने सेवा प्रभा सहज र छिटो छरितो बनाउने जस्ता विषय समेटिएको छ  । 

नीति तथा कार्यक्रममा कृषि मार्फत रोजगारी सिर्जना गर्ने, प्रविधि र नागरिक मैत्री सेवा विस्तारमा जोड दिने, विगत देखि  सञ्चालित  वहुवर्षीय आयोजनाहरू सम्पन्न गर्ने  तथा  विपद व्यवस्थापनका लागि अन्तर निकाय सम्बन्धलाई सुदृढ बनाउने, शिक्षालाई  रोजगारमूलक एवं सूचना प्रविधि मैत्री बनाउने कुरामा जोड दिइएको छ । 

यस्तै कार्यक्रममा प्रदेशको लगानी सम्मेलन आयोजना गर्ने, आन्तरिक राजस्व वृद्धिको लागि सम्भाव्यता अध्ययन प्रतिवेदनमा औँल्याइएका सुझावलाई कार्यान्वयन गरिने,  स्थानीय तहका स्वीकृत रिक्त दरबन्दीमा कर्मचारी पदपूर्ति प्रणालीलाई छिटो, छरितो,  गुणस्तरीय बनाउन कानूनी र संरचनागत सुधार गर्दे लैजाने, प्रदेश स्तरीय सञ्चार माध्यमहरूलाई नियमन गर्न आवश्यक कानून निर्माण गरिने छ, प्रदेश सरकारको कार्य सञ्चालन गर्न प्रदेशको राजधानी  भित्र प्राप्त हुने जग्गामा भौतिक संरचना निर्माणका लागि  गुरुयोजना तयार गरिने कुरा उल्लेख गरिएको छ ।

त्यस्तै स्थानीय तहसँगको साझेदारीमा स्वास्थ्य बिमा कार्यक्रमलाई प्रभावकारी बनाउन थप कार्यक्रम सञ्चालन गरिनेछ, कृषि क्षेत्रमा सानो लगानीबाट स्वरोजगार हुन चाहने युवाहरूलाई तरकारी, च्याउ, मह, पशुपालन आदि व्यवसाय सञ्चालनका लागि सहुलियतपूर्ण कर्जा तथा सहयोग उपलब्ध गराइने, कृषि वस्तु उत्पादन, भण्डारण, आपूर्ति, गुणस्तर नियमन जस्ता कार्यलाई व्यवस्थित गर्दै लगिने, स्थानीय तहसँगको सहकार्यमा सित भण्डार निर्माण तथा सञ्चालनमा सहकार्य गरिने, “एक स्थानीय तह एक उत्पादन कार्यक्रम” लाई व्यवस्थित गर्दै लगिने कुरामा जोड दिइएको छ । 

त्यस्तै  प्रदेशलाई औद्योगिक हबको रूपमा विकास गर्न उपयुक्त स्थानमा “कोशी औद्योगिक क्षेत्र” स्थापनाको लागि अध्ययन गरिने,  अल्लो, बाँस, बेतबाँस, भेडाको उन, पशुहरूको छाला, कोगटी जस्ता स्थानीय कच्चा पदार्थमा आधारित सङ्कलन तथा प्रशोधन केन्द्रको स्थापना गरी परम्परागत उद्यमशीलता प्रवर्द्धनका लागि उन्नत प्रविधि अवलम्बनमा सहयोग गरिने बताइएको छ । 

प्रदेश भित्रका सबै नागरिकको घरमा आगामी दुई वर्ष भित्रमा विद्युत् सुविधा पुर्‍याउन कार्ययोजना स्वीकृत गरी सम्बन्धित निकायसँगको सहकार्यमा कार्ययोजना कार्यान्वयन गरिने, सामुदायिक क्याम्पसहरूको गुणस्तरीय शैक्षिक कार्यक्रम सञ्चालनका लागि पूर्वाधार विकासमा सहयोग गरिने कुरा उक्त नीति तथा कार्यक्रममा उल्लेख गरिएको छ । 

लैङ्गिक हिंसा अन्त्यका लागि स्थानीय तहमा संरक्षण कोषको व्यवस्था गर्न सहजीकरण गरिने, कोशी प्रदेशभित्रका विभिन्न जातजाति, भाषाभाषी, सांस्कृतिक र ऐतिहासिक क्षेत्रभित्र रहेका लिपि, भाषा, साहित्य, कला, संस्कृति आदिको संरक्षण, संवद्र्धन, अध्ययन, अनुसन्धान गरी यस क्षेत्रलाई समृद्ध बनाउनका लागि प्रादेशिक संस्कृति नीति तर्जुमा गरिने बताइएको छ ।  

मोरङ जिल्लाको विराटनगर महानगरपालिकास्थित “बैजनाथपुर क्रिकेट मैदान” लाई अन्तर्राष्ट्रिय स्तरको प्रादेशिक क्रिकेट मैदान र झापा जिल्लाको कमल गाउँपालिका पाडाजुँगी स्थित “आदिवासी जनजाति रंगशाला” लाई प्रादेशिक रंगशालाको रुपमा विकास गरिने कुरालाई नीति तथा कार्यक्रममा जोड दिइएको छ ।