झापामा १० वर्षमा थपियो एक लाख ८५ हजारभन्दा बढी जनसङ्ख्या

भद्रपुर, झापा । एक दशकमा झापाको जनसङ्ख्या १ लाख ८५ हजारले बढेको तथ्याङ्कले देखाएको छ । 

राष्ट्रिय जनगणना २०७८ का अनुसार झापाको जनसङ्ख्या एक दशकमा एक लाख ८५ हजार ४०४ ले थपिएको हो ।

तथ्याङ्क अनुसार झापाको जनसङ्ख्या ९ लाख ९८ हजार ५४ छ । २०६८ सालको जनगणनामा झापाको जनसङ्ख्या ८ लाख १२ हजार ६५० थियो । 

केन्द्रीय तथ्याङ्क विभागका अनुसार झापामा २ लाख ४५ हजार १४२ घर–परिवार छन् । झापामा परिवारको औसत आकार चार जनाभन्दा बढी छ ।

पहाडी जिल्लाबाट बसाइँ सरेर आउने नागरिकको चाप पनि झापामा छ । इलाम, पाँचथर, ताप्लेजुङ, तेह्रथुम, धनकुटा, भोजपुर खोटाङ लगायतका जिल्लाबाट बसाइँ सरेर आउनेहरू पनि उत्तिकै छन् ।

नेपालका ७७ जिल्लामध्ये सबैभन्दा बढी जनसङ्ख्या भएको चौथो जिल्लाका रुपमा झापा पर्दछ ।