सल्यानमा हिरासत भित्रै थुनुवाद्वारा आत्महत्याको प्रयास

सल्यान ।  जिल्ला प्रहरी कार्यालय सल्यानको हिरासत भित्र एक व्यक्तिले आत्महत्याको प्रयास गरेका छन् । जबरजस्ती हाडनाता करणीमा पक्राउ परेका बनगाड कुपिण्डे नगरपालिकाका ३४ वर्षीय थुनुवाले हिरासत भित्रै ब्लेडले घाँटी काटेर आत्महत्याको प्रयास गरेका हुन् ।  

आइतबार बिहान ८ः३० बजे डिउटीमा खटिएका प्रहरीको आँखा छलेर बलाङकेट ओढेर ओछ्यान भित्र बिलेटले घाँटी काटेर आत्महत्याको प्रयास गरेको प्रहरी निरीक्षक सन्तोष खनालले जानकारी दिनुभयो । 

उहाँका अनुसार उक्त व्यक्ति बिहान अबेरसम्म सुतेको र नास्ता खान उठाउन खोज्दा ओछ्यानबाट रगत बगिरहेको देखेपछि हिरासत बाट निकालेर तत्काल उपचारका लागि जिल्ला अस्पताल सल्यानमा लगिएको हो । 

ब्लेडले धेरै काटिएकाले जिल्ला अस्पताल सल्यानमा उपचार सम्भव नभएपछि थप उपचारका लागि प्रादेशिक अस्पताल कालागाउँ सुर्खेतमा रिफर गरिएको प्रहरी निरीक्षक खनालले बताउनु भयो । उनी गएको २५ गते जबरजस्ती हाडनाता करणीमा पक्राउ परेका थिए । उनलाई ५ दिनको म्याद थप गरी जिल्ला प्रहरी कार्यालयको हिरासतमा राखिएको थियो । 

उनी सँग ब्लेड कसरी र कहाँ बाट आयो भन्ने बारेमा अनुसन्धान भइरहेको जिल्ला प्रहरी कार्यालय सल्यानले जनाएको छ ।