सवारी दुर्घटनामा घाइते भएका बालकको मृत्यु
भक्तपुर । भक्तपुरमा तीन वटा सवारी साधन एकसाथ दुर्घटना हुँदा ६ वर्षीय बालकको मृत्यु भएको छ ।
हिजो दिउँसो सुर्यविनायक नगरपालिका–५ सृजनानगरमा भएको दुर्घटनामा परी मोटरसाइकलमा सवार ६ वर्षीय बालकको मृत्यु भएको जिल्ला प्रहरी परिसर भक्तपुरका सूचना अधिकारी डिएपी राजु पाण्डेले बताउनुभयो ।
मोटरसाइकल चालक दोलखा घर भई काठमाडौँ बौद्ध बस्ने ४९ वर्षीय ढावा शेर्पा घाइते भएका छन् । ढावाका ६ वर्षीय छोरा आर्जनको उपचारको क्रममा मृत्यु भएको प्रहरीले जनाएको छ ।
आर्जनको आज बिहान नर्भिक अस्पताल काठमाडौँमा मृत्यु भएको डिएसपी पाण्डेले बताउनुभयो ।
जगातीबाट काठमाडौँ आउँदै गरेको बा ६ च ८८५८ नम्बरको कार, बा ५५ प ९९२२ नम्बरको मोटरसाइकल र बा ४ ख ५७९६ नम्बरको बस दुर्घटनामा परेका हुन् ।
डिएसपी पाण्डेका अनुसार ढावाको मध्यपुर ठिमीमा उपचार भइरहेको छ ।
प्रतिक्रिया राख्नुहोस्