ट्रकसहित तस्करीको ६७ लाख ५२ हजार बढीको सामान बरामद

वीरगञ्ज । पर्सा प्रहरीले वीरगन्जबाट बिल बिजक भन्दा बढी ६७ लाख ५२ हजार रुपैयाँको हार्डवेयर पार्टस तथा खुद्रा सामान बोकेको ट्रक नियन्त्रणमा लिएको छ ।

जिल्ला प्रहरी कार्यालय पर्साबाट खटिएको गस्ती टोलीले गए राति १० बजे वीरगञ्ज महानगरपालिका वडा नम्बर १५ भानुचोक स्थित सडकखण्डमा ना.६ ख ६६६७ नम्बरको मालवाहक ट्रकलाई रोकी चेकजाँच गर्ने क्रममा विल बिजक भन्दा बढी देखिएको तथा विल बिजक बिनाका विभिन्न किसिमका हार्डवेयर पार्टस समेत फेला परेको हुँदा उक्त ट्रक नियन्त्रणमा लिइएको जिल्ला प्रहरी कार्यालय पर्साका प्रहरी उपरीक्षक रमेश बस्नेतले बताउनुभयो ।

ट्रकसहित सामानको ६७ लाख ५२ हजार ९ सय ९८ रुपैयाँ मूल्याङ्कन गरी आवश्यक कारबाहीको लागि आज राजश्व अनुसन्धान कार्यालय पथलैया, बारामा बुझाइएको बस्नेतले जानकारी दिनुभयो ।