तेस्रो बकुलिया गोल्ड कप : पहिलो खेलमा हेटौँडा फुटबल एकेडेमी विजयी 

बारा  । तेस्रो बकुलिया गोल्ड कपको पहिलो खेलमा हेटौडा फुटबल एकेडेमीले विजयी सुरुवात गरेको छ ।

सडेन डेथमा नेपाल खेलकुद क्लब चपुरलाई हराउँदै हेटौँडा फुटबल एकेडेमीले विजय सुरुवात गरेको हो ।

जीतपुर सिमरा उपमहानगरपालिका वडा नं.५ को आयोजनामा भइरहेको खेलमा  हेटौँडा फुटबल एकेडेमीका जर्सी नं. १४का खेलाडी साजन जिम्वाले १७औँ  मिनेटमा नेपाल खेलकुद चपुरको विरुद्ध गोल गरेका थिए । 

खेलको ६५औँ मिनेटमा नेपाल खेलकुद चपुरको तर्फबाट जर्सी नं.७ का खेलाडी रोहन लामाले गोल फर्काएका थिए । 

निर्धारित सम भित्र दुवै पक्षको एक, एक गोल भएपछि खेल टाई ब्रेकरमा गएको थियो । टाई ब्रेकरमा पनि खेल बराबरीमा टुङ्गिएपछि खेल सडेन डेथमा प्रवेश गरेको थियो । 

सडेन डेथमा हेटौँडा फुटबल एकेडेमीका जर्सी नं. १२ का खेलाडी सुदिप रेग्मीले निर्णायक गोल गरी आफ्नो टिमलाई विजय गराउन सफल भएका थिए । 

खेलको म्यान अफ दी म्याच विजय टिमका गोल किपर असमीर गोन्घा घोषित भए । 

खेल सुरु हुनुभन्दा अगाडि भएको औपचारिक कार्यक्रमको उद्घाटन नारायणी अञ्चलका प्रमुख प्रशिक्षक कोच रहिसक्नु भएका हरि बहादुर श्रेष्ठले उद्घाटन गर्नुभएको थियो ।

प्रमुख प्रशिक्षक कोच श्रेष्ठले राज्यले खेलाडीहरूको वृद्धि र विकासको विषयमा सोच्नुपर्ने आवश्यकता औँल्याउनुभएको थियो । 

फागुन १९ गतेदेखि सुरु भएको प्रतियोगिता फागुन २८ गतेसम्म चल्ने छ । प्रतियोगितामा प्रथम हुनेले एक लाख रुपैयाँ र द्वितीय हुनेले रु ५० हजार रुपैयाँ प्राप्त गर्ने छन् ।