चितवनमा आज एकै दिन ४१ जनामा कोरोना संक्रमण

चितवन । चितवनमा कोरोना संक्रमण भयावह बन्दै जाने खतरा बढेको छ ।

स्वास्थ्य कार्यालय चितवनले उपलब्ध गराएको तथ्याङ्क अनुसार आइतबार एक जना पनि संक्रमित नथपिएको चितवनमा विगत २४ घण्टामा ४१ जनामा संक्रमित थपिएपछि अवस्था भयावह बन्दै गएको हो । 

यसअघि चितवनमा फाट्टफुट्ट मात्र संक्रमण देखिने गरेको थियो ।

स्वास्थ्य कार्यालय चितवनले आज उपलब्ध गराएको तथ्याङ्क अनुसार भरतपुर महानगरपालिकामा २९ जना, खैरहनी नगरपालिकामा एक जना, माडी नगरपालिकामा तीन जना, रत्ननगर नगरपालिकामा ५ जना, राप्ती नगरपालिकामा तीन जना संक्रमित थपिएका हुन् । 

योसँगै चितवनमा सक्रिय सङ्क्रमितको सङ्ख्या ११९ जना पुगेको छ । जसमध्ये घरमा आइसोलेसनमा १ सय १२ जना र अस्पतालको आइसोलेसनमा सात जना रहेका छन् ।

 चितवनमा आजसम्म ४सय ३७ जनाले कोरोना सङ्क्रमणको कारणले ज्यान गुमाएका छन् ।