प्रधानमन्त्री कप क्रिकेटको उपाधि त्रिभुवन आर्मीलाई
काठमाडौँ । प्रधानमन्त्री कप एक दिवसीय पुरुष क्रिकेट प्रतियोगिताको उपाधि विभागीय टिम त्रिभुवन आर्मी क्लबले उचालेको छ ।
काठमाडौँको कीर्तिपुरस्थित त्रिभुवन विश्वविद्यालय क्रिकेट मैदानमा शनिवार सम्पन्न फाइनलमा अर्को विभाग टिम एपीएफ क्लबलाई ३३ रनले हराउदैं आर्मीले चौथो संस्करणको उपाधि भित्र्याएको हो ।
त्रिभुवन आर्मीले उपाधिसँगै आर्मीले १० लाख प्राप्त गरेको छ भने उपविजेता बनेको एपीएफले ५ लाख रुपैयाँ प्राप्त गरेको छ ।
आर्मीले दिएको २ सय १२ रनको लक्ष्यसहित जवाफी ब्याटिङ गरेको एपीएफ ४१ ओभर ३ बलमा अलआउट हुँदै १ सय ७८ रनमा समेटियो ।
एपीएफले ४० ओभरपछि एकपछि अर्को गर्दै ३ विकेट गुमाएपछि आर्मीलाई उपाधि जित्न सहज भयो । एपीएफले ४ रन बनाउन ४ विकेट गुमायो ।
एपीएफका आसिफ शेखले ६१ रनको अर्धशतकीय इनिङ्स खेले पनि जितका लागी पर्याप्त भएन ।
उसका सन्दीप जोराले २९ रन, शङ्कर रानाले २१ ,सुमित महर्जनले १९, सुवास खकुरेल १४ रनमा आउट भए ।
कप्तान शरद भेषवाकर सहित अविनाश बोहरा शून्य रनमा आउट हुँदा कमलसिंह ऐरी २, अमर रौटेला १ मा पवेलियन फर्किए ।
आर्मीका जितेन्द्र मुखिया, विक्रम सोब र शाहब आलमले ३–३ विकेट लिए भने सुशन भारीका नाममा १ विकेट रह्यो ।
यस अघि टस हारेर पहिले ब्याटिङ गरेको आर्मीले ५० ओभर ९ विकेट गुमाएर २ सय ११ रन बनाएको योगफल बनाएको थियो ।
आर्मीका हरि चौहानले सर्वाधिक ५८ रन बनाए भने राजेश पुलामीले २८, शाहब आलम २५, लोकेश बमले १५ रनको योगदान गरे ।
एपीएफका अविनाश बोहोराले २ मेडनसहित २५ रन खर्चिएर ४ विकेट लिए ।
सन २०१७ को प्रधानमन्त्री कपको उपाधि आर्मी र एपीएफलाई संयुक्त रुपमा प्रदान गरिएको थियो भने त्यसपछिका एक संस्करण नेपाल पुलिस र एपीएफले जितेका थिए ।
तस्वीरःक्रिकनेपाल डट कम
प्रतिक्रिया राख्नुहोस्