गण्डकी प्रदेशमा थपिए २५ जना कोरोना सङ्क्रमित, कुल सङ्ख्या १२२८ पुग्यो
तनहुँ । गण्डकी प्रदेशका थप २५ जनामा कोरोना सङ्क्रमण पुष्टि भएको छ । योसँगै गण्डकी प्रदेशको कुल सङ्क्रमित सङ्ख्या एक हजार दुई सय २८ पुगेको छ ।
स्वास्थ्य निर्देशनालय गण्डकीका अनुसार म्याग्दी, तनहुँ, नवलपुर, गोरखा र कास्कीमा गरी थप २५ जनामा कोरोना पुष्टि भएको हो ।
निर्देशनालयका अनुसार म्याग्दीको बेनीमा तीन, मालिकमा चार, रघुगंगा र मङ्गलामा एक, एक जना गरी नौ सङ्क्रमित थपिएका छन् ।
यसै गरी तनहुँको भिमाद नगरपालिकामा दुई जना, आँबुखैरेनी गाउँपालिकामा एक गरी तीन जना सङ्क्रमित थपिएका छन् । या सँगै तनहुँमा कुल कोरोना सङ्क्रमित एक सय ६४ जना छ ।
त्यस्तै नवलपुरको कावासोतीमा–२ बुलिङटारमा आठ पुरुष र एक महिला गरी ११ सङ्क्रमित थपिएका छन् । त्यसै गरी गोरखा र कास्कीमा एक एक जना पुरुष सङ्क्रमित थपिएका छन् ।
क्षयरोग उपचार केन्द्र पोखरा, भरतपुर अस्पताल, चितवन र पोखरा स्वास्थ्य विज्ञान प्रतिष्ठान पोखरा गरिएको परीक्षणमा गण्डकी प्रदेशमा नयाँ २५ जना कोरोना सङ्क्रमित थपिएका हुन् ।
अहिले सबै सङ्क्रमित व्यक्तिहरूलाई सम्बन्धित जिल्लाहरूमा रहेका आइसोलेसन कक्षमा लैजाने तयारी भइरहेको स्वास्थ्य निर्देशनालय गण्डकीका निर्देशक डा.विनोद विन्दु शर्माले जानकारी दिनुभयो ।
यसै गरी गण्डकी प्रदेशमा कोरोनाको सङ्क्रमणबाट निको भई डिस्चार्ज हुनेको सङ्ख्या नौ सय २५ पुगेको निर्देशक डा.शर्माले बताउनुभयो ।
प्रतिक्रिया राख्नुहोस्