विकास र समृद्धिका लागि सबै पक्षबीच संवाद र सहकार्य आवश्यक : सभामुख अर्याल

महोत्तरी । सभामुख डोलप्रसाद अर्यालले विकास र समृद्धिका लागि सबै पक्षको साझा प्रयत्न, संवाद र सहकार्य आवश्यक रहेको बताउनुभएको छ ।
छठ पर्वका लागि मधेस आउनुभएका सभामुख अर्यालले आज बर्दिबासमा स्थानीय बासिन्दासँगको भेटघाटमा मधेसको शिक्षा, स्वास्थ्य र कृषि क्षेत्रमा परिणाममुखी काम गर्नुपर्नेमा जोड दिनुभयो । उहाँले विकासविना समृद्धि नहुने बताउँदै यसका लागि सबैको साझा प्रयत्न र संवाद जरुरी रहेको बताउनुभयाे ।
“हामीले मधेसको शिक्षा, स्वास्थ्य र कृषिमा विशेष जोड दिएर काम गर्नुपर्ने छ”, सभामुख अर्यालले भन्नुभयो, “विकासका यी मुद्दामा सबै पक्षबीच आपसी संवाद बढाएर परिणाम देखिने काम हुनुपर्छ ।” कृषिसँग सम्बन्धित उद्योगधन्दा विकास गर्नसके रोजगारीका अवसर बढ्न सक्ने र यसले विदेश पलायनको क्रम रोक्न मद्दत पुग्ने उहाँले बताउनुभयो ।
मधेसमा यसपालि छठ पर्व मनाउन आउँदा यहाँको सांस्कृतिक सद्भाव, आपसी हेलमेल र सहिष्णुताले मन प्रफुल्ल बनाएको सभामुख अर्यालको भनाइ छ । चाडबाडमा देखिएको यो सद्भाव विकासमा मुखरित गर्नसके हामीले चाहेको समृद्धि हात पर्ने उहाँले स्पष्ट गर्नुभयो ।
“राजनीतिमा स्वस्थ्य प्रतिस्पर्धा हुनपर्छ, राजनीति सुशासन र विकासप्रति समर्पित हुन आवश्यक छ”, सभामुख अर्यालले भन्नुभयो, “यस विषयमा आमजनताले आफ्ना प्रतिनिधिलाई घचघच्याइ रहनुपर्छ ।” संसद्ले एक युगसम्म जनताले अपनत्व लिनसक्ने गरी कानुनको तर्जुमा र संविधान संशोधनका विषय पहिल्याउने र टुङ्ग्याउने काम गर्नपर्ने उहाँको धारणा छ ।
“कमसेकम अहिलेको हाम्रो पुस्ताको कामलाई हाम्रा नाति पुस्ताले बाजेहरुले ठिकै गर्न खोजेका रहेछन् भन्ने अनुभूति लिन सकुन्”, सभामुख अर्यालले भन्नुभयो, “राम्रो परिणामका लागि फेरि पनि हामीबीच समुन्नत सहमति, सहकार्य र सहअस्तित्व हुनपर्छ ।” वीरगञ्जमा छठ पर्व सकेर हुलाकी सडक हुँदै बर्दिबास आइपुग्नुभएका अर्याल यहाँको भेटघाट कार्यक्रमपछि काठमाडौँ प्रस्थान गर्नुभयो ।







प्रतिक्रिया राख्नुहोस्