माइक्रो बसले ‘ओभरटेक’ गर्दा अन्य सवारीलाई सास्ती

चितवन । नारायणगढ(मुग्लिन सडकखण्डमा माइक्रोबसले जोखिमपूर्ण ढङ्गले ‘ओभरटेक’ (उछिन्ने) गर्दै तीव्र गतिमा सवारी चलाउने प्रवृत्ति बढ्दा अन्य सवारीचालक तथा यात्रुले सास्ती भोग्नुपरेको छ । पूर्व-पश्चिम तथा काठमाडौँ-पोखरा जोड्ने व्यस्त राजमार्गमा पहिरोका कारण हुने अवरोधसँगै यस्ता सवारीको लापरबाहीले ट्राफिक जाम, दुर्घटनाको जोखिम र यात्रामा थप हैरानी बढाएको गुनासो आएको छ ।

बागमती प्रदेश नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय (रामनगर)का प्रमुख एवं प्रहरी उपरीक्षक डिल्लीनारायण पाण्डेका अनुसार हाइस तथा माइक्रोबसले जथाभाबी ओभरटेक गर्दा सडकमा अनावश्यक जाम हुनुका साथै दुर्घटनाको जोखिमसमेत बढ्ने गरेको छ । उहाँले प्रहरीले देखेका स्थानमा तत्काल कारबाही र चालकलाई सचेत गराउने काम भइरहे पनि कतिपय चालकले प्रहरीको निगरानी छल्दै नियम उल्लङ्घन गर्ने गरेको बताउनुभयो ।

नारायणगढ(मुग्लिन सडकखण्डबाट दैनिक हजारौँ सवारी साधन आवतजावत गर्ने भएकाले एउटै सवारीको लापरबाहीले घण्टौँसम्म ट्राफिक जाम हुने अवस्था सिर्जना हुने गरेको उहाँले बताउनुभयो । अब यस्ता गतिविधि नियन्त्रणका लागि थप व्यवस्थित रूपमा निगरानी र कारबाहीलाई प्रभावकारी बनाइने उहाँको भनाइ छ ।

पाण्डेका अनुसार सडकका विभिन्न स्थानमा सिसीटिभी क्यामेरामार्फत निगरानी भइरहेको छ भने समयसमयमा स्पिड गन (स्पिड राडार) प्रयोग गरी तीव्र गतिमा सवारी चलाउने चालकमाथि कारबाही गरिँदै आएको छ । “यात्रुलाई सुरक्षित रूपमा गन्तव्यसम्म पुर्‍याउनु चालकको कर्तव्य हो,” उहाँले भन्नुभयो, “चालकलाई सचेत गराउनु प्रहरीको दायित्व हो । तर केही चालकले प्रहरीलाई छल्ने प्रयास गर्दै आफैँ र अरूको ज्यान जोखिममा पार्ने गरी सवारी चलाउने गरेका छन् ।” 

यहाँका सडकमा समयसमयमा खस्ने पहिरोले लामो सवारी जाम हुने गर्दछ । त्यही बीचमा ओभरटेक गर्दा उद्धारमा समस्या हुने गरेको प्रहरी उपरीक्षक पाण्डेले बताउनुभयो । यस्तो अवस्थामा हुने जामका कारण यात्रुलाई गन्तव्यमा पुग्न झन ढिलो हुने गरेको उहाँको भनाइ छ ।