बोस्नियालाई हराउँदै अमेरिका अन्तिम १६ मा, अब बेल्जियमसँग भिड्ने

काठमाडौं। सहआयोजक अमेरिकाले फिफा विश्वकप २०२६ को अन्तिम १६ मा स्थान सुरक्षित गरेको छ।

सान फ्रान्सिस्को बे एरिया स्टेडियममा बिहीबार भएको खेलमा बोस्निया एन्ड हर्जगोभिनालाई २–० ले पराजित गर्दै अमेरिकाले नकआउट चरणमा स्थान बनाएको हो।

अमेरिकाको जितमा फोलारिन बालोगुन र मलिक टिलम्यानले एक–एक गोल गरे। पहिलो हाफको ४५औँ मिनेटमा बालोगुनले गोल गर्दै टोलीलाई अग्रता दिलाएका थिए। तर, ६४औँ मिनेटमा रातो कार्ड पाएपछि उनी मैदानबाट बाहिरिएसँगै अमेरिका १० खेलाडीमा सीमित भएको थियो।

एक खेलाडी कम हुँदा पनि अमेरिकाले खेलमा नियन्त्रण कायम राख्यो। ८२औँ मिनेटमा मलिक टिलम्यानले डिबक्स बाहिरबाट प्रहार गरेको आकर्षक फ्रिकिक सिधै गोलमा परिणत भएपछि अमेरिकाले २–० को सुरक्षित अग्रता बनायो।

बाँकी समयमा बोस्नियाले गोल फर्काउन नसकेपछि अमेरिका विजयी हुँदै अन्तिम १६ मा पुगेको हो।

यो जितसँगै अमेरिकाले २४ वर्षपछि विश्वकपको नकआउट चरणमा पहिलो जित दर्ता गरेको छ। यसअघि सन् २००२ को विश्वकपमा अमेरिका क्वार्टरफाइनलसम्म पुगेको थियो। त्यसयता भने टोली दोस्रो चरणबाट अघि बढ्न सकेको थिएन।

यस नतिजासँगै विश्वकपका तीनै आयोजक राष्ट्र—अमेरिका, क्यानडा र मेक्सिको—अन्तिम १६ मा पुगेका छन्। क्यानडा र मेक्सिकोले यसअघि नै आफ्नो स्थान सुरक्षित गरिसकेका थिए।

अब क्वार्टरफाइनल प्रवेशका लागि अमेरिकाले बेल्जियमसँग प्रतिस्पर्धा गर्नेछ।