सहिद कपको उपाधि पर्सा जिल्लालाई

जनकपुरधाम । जनकपुरधाममा आज सम्पन्न भएको सहिद कप महिला टी–२० क्रिकेट प्रतियोगिताको उपाधि पर्सा जिल्लाले जितेको छ ।

जनकपुरधामको निर्माणाधीन रामजानकी बहुउद्देश्यीय रङ्गशालामा आज हुने भनिएको फाइनल खेल वर्षाले हुन नसकेपछि टसको आधारमा पर्सा टिम विजयी भएको हो । शहिद कप २०२६ को उपाधि विजेता पर्सा महिला क्रिकेट टिम भएको छ भने उपविजेता सिरहा जिल्ला महिला क्रिकेट टिम भएको छ । दुवै टिम फाइनलमा पुगेका थिए ।  

मधेश प्रदेशका खेलकुद तथा समाज कल्याण मन्त्रालयको आयोजनामा तथा नेपाल क्रिकेट सङ्घको समन्वयमा सम्पन्न भएको सहिद कपमा मधेश प्रदेशका ८ जिल्लाका महिला क्रिकेट टिमको सहभागिता रहेका थिए ।

विजयी भएका टिमलाई मधेश प्रदेशका प्रदेश प्रमुख डा. सुरेन्द्र लाभ कर्णले शिल्ड, कप तथा प्रमाणपत्र प्रदान गर्नु भएको हो । कार्यक्रममा बोल्दै प्रदेश प्रमुख डा. कर्णले मधेश प्रदेशको महिला खेलाडीहरू क्रिकेट तर्फ आकर्षित हुनु गर्भको विषय भएको बताउनु भयो ।

उहाँले महिलाहरू शक्ति स्वरुपा भएकाले अहिले नेपालको विभिन्न खेलकुदमा महिलाहरू अगाडी बढ्न थालेकोमा खुशी व्यक्त गर्दै क्रिकेट खेल पछिल्लो केही वर्ष यता नेपालमा अत्यधिक लोकप्रिय बन्नुका साथै यसको विकास भएकोमा खुशी व्यक्त गर्नु भयो ।

वैशाख ३१ गतेबाट शुरु भएको सहिद कप महिला टि–२० क्रिकेट प्रतियोगिताले क्रिकेट प्रति महिला खेलाडीको आकर्षण बढ्ने जिल्ला क्रिकेट संघ धनुषाका अध्यक्ष शोभाकान्त पाण्डे गुड्डुले बताउनु भयो । प्रतियोगिताको समापन कार्यक्रममा संघका जिल्ला सदस्य सरोज कुमार मिश्रले मधेश प्रदेशमा महिला क्रिकेट खेलाडीको पहिचानमा ठूलो मद्दत पुग्ने बताउनु भयो ।