पर्सामा बिहान ११ बजे सम्म २० प्रतिशत मत खस्यो

वीरगञ्ज। पर्सा जिल्लामा अहिले बिहान ११ बजे सम्ममा २० प्रतिशत मतदान भइसकेको छ।

पर्साका प्रमुख जिल्ला अधिकारी भोला दाहालले जिल्लाका ४ निर्वाचन क्षेत्रमा १ सय ६७ मतदानस्थलमा रहेका ४ सय ४१ मतदान केन्द्रमा अहिलेसम्म शान्तिपूर्ण रुपमा मतदान भइरहेको र ११ बजेसम्म २० प्रतिशत मत खसीसकेको बताउनुभयो । 

जिल्लाका मतदान स्थलहरूबाट खसेको मतको परिणाम सुरक्षाकर्मी मार्फत प्रत्येक घण्टामा स्थानीय प्रशासनले लिने व्यवस्था समेत मिलाइएको प्रमुख जिल्ला अधिकारी भोला दाहालले बताउनुभयो । 

पर्सा जिल्लामा शान्तिपूर्ण रुपमा मतदान भइरहेको र मतदाताहरूको समेत उल्लेख्य रुपमा सहभागिता रहेको छ । 

आज सम्पन्न हुने प्रतिनिधिसभा सदस्यको निर्वाचनका लागि पर्सामा ३ लाख ५२ हजार ४ सय ८४ जना मतदाता रहेका छन् । पर्सामा ४ निर्वाचन क्षेत्र बाट राजनीतिक दल र स्वतन्त्र गरी ९७ जना उम्मेदवार  चुनावी प्रतिस्पर्धामा होमिएका छन् । 

पर्सा निर्वाचन क्षेत्र नम्बर १ मा ८९ हजार ६ सय ३८ जना मतदाताले मतदान गर्नेछन् । जसमा ५० हजार ४ सय ६ जना पुरुष र ३९ हजार २ सय ३० जना महिला र अन्य २ जना मतदाता रहेका छन् ।

त्यसैगरी पर्सा क्षेत्र नम्बर २ मा ९५ हजार १ सय २० जना मतदाता रहेका छन् ।  जसमा ५३ हजार ७ सय १७ जना पुरुष, ४१ हजार ४ सय महिला र अन्य ३ जना मतदाता रहेका छन् । 

पर्साकै क्षेत्र नम्बर ३ मा ९६ हजार ५ सय ४२ जना मतदाता रहेका छन् । जसमा ५४ हजार ८ सय ९४ जना पुरुष, ४१ हजार ६ सय ४४ जना महिला र अन्य ४ जना रहेका छन् । 

पर्साको क्षेत्र नम्बर ४ मा ९५ हजार २ सय १३ जना मतदाता रहेका छन् । जसमा ५३ हजार ६० जना पुरुष, ४२ हजार १ सय ४७ जना महिला र अन्य ६ जना मतदाता छन्  ।