परिणाम आउने गरी जनताको पक्षमा काम गर्न मन्त्री सुडीको निर्देशन

काठमाडौँ । महिला, बालबालिका तथा ज्येष्ठ नागरिक मन्त्री नवलकिशोर साह सुडीले जनतालाई प्रत्यक्ष लाभ हुने गरी द्रुत गतिमा काम गर्न कर्मचारीलाई निर्देशन दिनुभएको छ ।  

मन्त्रालयद्वारा यहाँ आज आयोजित आर्थिक वर्ष २०८२/८३ को कार्यसम्पादन सम्झौता कार्यक्रममा उहाँले भन्नुभयो, “मैँले तपाईँ कर्मचारी र सचिवालयमा कार्यरत मेरा सहयोगीहरूको भरमा प्रधानमन्त्रीसँग कार्यक्रमको सम्झौता गरेको छु, यो सबै गर्न म एक्लैले सम्भव छैन, मलाई आशा छ, तपाईँहरूले तीव्र गतिमा परिणाम आउने गरी काम गर्नुहुने छ ।”

मन्त्री सुडीले आफ्नो मन्त्रालयको कामलाई छिटो र छरितो बनाउनका लागि आफूले सचिवसँग र सचिवले सहसचिव, उपसचिव र शाखा प्रमुखसँग आज कार्यसम्पादन सम्झौता गरेको बताउनुभयो । 

फरक प्रसङ्गमा मन्त्री सुडीले अपाङ्गता भएका व्यक्तिको अधिकारसम्बन्धी ऐन, २०७४ बमोजिम सरकारले सामाजिक सेवा एकाइ कार्यक्रम सञ्चालन भएका ७७ जिल्लाका ९४ अस्पतालबाट ज्येष्ठ नागरिकका लागि निःशुल्क तथा आंशिक रूपमा अस्पतालले तोकिएको स्वास्थ्य सेवा उपलब्ध हुने व्यवस्था गरेको बताउनुभयो । ऐनमा ज्येष्ठ नागरिकले उपचार गराउँदा लाग्ने शुल्कमा कम्तीमा ५० प्रतिशत छुट दिने व्यवस्था गरेको छ । 

त्यसैगरी, मन्त्रालयले ज्येष्ठ नागरिक स्वास्थ्य सेवा कार्यक्रम सञ्चालन भएका ६४ अस्पतालबाट निःशुल्क तथा आंशिक रूपमा अस्पतालले तोकिएको ज्येष्ठ नागरिक–मैत्री सेवा उपलब्ध हुने व्यवस्था रहेको पनि जनाएको छ । जसमा प्रदेशअन्तर्गत कोशी प्रदेशका १९, मधेसका आठ, बाग्मतीका १३, गण्डकीका ६, लुम्बिनीका ११, कर्णालीका ६ र सुदूरपश्चिमका नौ अस्पतालमा उक्त व्यवस्था गरिएको छ ।