अरुण–३ को अवलोकन गर्न भारतीय विद्युत् मन्त्री खट्टर मङ्गलवार नेपाल आउँदै

काठमाडौँ । भारतीय विद्युत् र आभास तथा शहरी मामिला मन्त्री मनोहरलाल खट्टर नेपाल आउँदै हुनुहुन्छ।

मन्त्री खट्टर अरुण–३ जलविद्युत आयोजनाको अवलोकनको लागि मङ्गलवार (बैशाख ९ गते) नेपाल आउन लाग्नुभएको हो ।    

भारतीय कम्पनी सतलज जलविद्युत् निगम (एसजेवीएन)को स्वामित्वमा रहेको एसजेवीएन अरुण–३ पावर डेभलपमेन्ट कम्पनी (एसएपीडीसी)ले निर्माण गरिरहेको उक्त आयोजनाको निरीक्षणको लागि मन्त्री खट्टर आउन लागेको बताइएको छ । 

आयोजनाको अवलोकन गरी खट्टर बुधबार स्वदेश फर्किनुहुने जनाइएको छ । साथै, ऊर्जा, जलस्रोत तथा सिँचाइमन्त्री दीपक खड्का पनि अरुण–३ को अवलोकन गर्न पुग्ने बताइएको छ । उक्त कार्यक्रममा एसजेवीएनका अध्यक्ष राज कुमार चौधरी तथा प्रमुख प्रशासकीय अधिकृत (सीईओ) प्रशान्त शर्माको पनि सहभागिता हुनेछ ।  

विशेष गरी ऊर्जा मन्त्री दीपक खड्काको निमन्त्रणामा खट्टर नेपाल आउँदै हुनुहुन्छ । खट्टरले मन्त्री खड्कासँग अन्य जलविद्युत् आयोजनामा भारतीय लगानी साथै नयाँ आयोजनाका विषयमा छलफल गर्ने कार्य तालिका रहेको छ । 

यस्तै, उहाँ ९ गते नै अरुण–३ जलविद्युत आयोजनाको बाँध तथा पावर हाउस क्षेत्रको निरीक्षण गरी काठमाडौँ फर्कनुहुने कार्यक्रम रहेको छ । सोही दिन ऊर्जा मन्त्री खड्कासँगै भारतका विद्युत् मन्त्री खट्टरले विभिन्न ठाउँका सवस्टेशनको संयुक्त रूपमा उद्घाटन गर्नुहुने कार्य तालीका रहेको छ । 

यसैगरी दुई देशले संयुक्त लगानीमा निर्माण गर्न लागेको प्रसारण लाइनको सम्झौतापत्रमा हस्ताक्षर गरेर निर्माणको प्रक्रिया अगाडि बढाइने बताइएको छ । वैशाख १० गते मन्त्री खट्टरले मुस्ताङको मुक्तिनाथको दर्शन गरी नेपाली मन्त्री तथा प्रधानमन्त्रीलाई भेटेर भारत फर्किने एसजेवीएनले जानकारी दिएको छ ।  

एसजेवीएनले सङ्खुवासभामा नौ सय मेगावाट क्षमताको अरुण तेस्रोको काम अहिले तीव्र गतिमा गरिरहेको छ । अरुण तेस्रो आयोजनाको अधिकांश संरचनाको काम अन्तिम चरणमा पुगी सकेको छ । कम्पनीले सो आयोजनाको काम छिटो सक्ने लक्ष्यका साथ गरिरहेको छ । यस्तै, एसजेवीएनको सहायक एसएपीडीसीले ६६९ मेगावाटको तल्लो अरुण जलविद्युत् आयोजना निर्माण गरिरहेको छ ।