अध्यादेश प्रतिस्थापन विधेयक संसदमा पेश गर्ने सरकारको निर्णय
काठमाडौँ । संघीय संसदबाट विभिन्न पाँच वटा अध्यादेश स्वीकृत भएकोले त्यस सम्बन्धी प्रतिस्थापन विधेयक सरकारले संघीय संसदमा पेश गर्ने भएको छ ।
फागुन २१ गतेको मन्त्रीपरिषद् बैठकका निर्णय सार्वजनिक गर्दै सञ्चार तथा सूचना प्रविधि मन्त्री पृथ्वी सुब्बा गुरुङले त्यस विषयमा जानकारी दिनुभएको हो ।
बैठकले चालु आर्थिक वर्ष २०८१/८२ को लागि चैते धानको प्रति क्विन्टल २ हजार ८ सय रुपैयाँ ६९ पैसा न्यूनतम समर्थन मूल्य तोक्ने निर्णय गरेको छ । सरकारले प्रधानमन्त्री केपी शर्मा ओलीको मानव अधिकार तथा सङ्क्रमणकालीन न्याय सम्बन्धी सल्लाहकारमा अग्निप्रसाद खरेललाई नियुक्त गर्ने निर्णय गरेको छ ।
मन्त्रीपरिषद् बैठकले नेपाल विद्युत् प्राधिकरणका कार्यकारी निर्देशक कुलमान घिसिङलाई पदबाट किन नहटाउने भन्ने विषयमा मन्त्रिपरिषद्समक्ष तीन दिनभित्र सफाई पेश गर्न मौका दिने प्रयोजनका लागि ऊर्जा, जलस्रोत तथा सिँचाई मन्त्रालयले पत्राचार गर्ने निर्णय गरेको छ ।
यही फागुन २६ गतेदेखि चैत ८ गतेसम्म न्यूयोर्कमा आयोजना हुने संयुक्त राष्ट्रसङ्घीय महिलाको स्थिति सम्बन्धी आयोग ( csw) को ६९औँ सम्मेलनमा सहभागी हुन महिला, बालबालिका तथा ज्येष्ठ नागरिक मन्त्री नवलकिशोर शाह सुडीको नेतृत्वमा प्रतिनिधिमण्डलको भ्रमण स्वीकृत गर्ने निर्णय पनि मन्त्रिपरिषद् बैठकले गरेको जानकारी सरकारका प्रवक्ता मन्त्री गुरुङले दिनुभयो ।
फागुन २९ गते बेलायतको लण्डनमा आयोजना हुने कार्यक्रममा वन तथा वातावरणमन्त्री ऐन बहादुर शाही ठकुरीलाई र चैत ५ र ६ गते जर्मनीको उर्लिनमा आयोजना हुने कार्यक्रममा ऊर्जा, जलस्रोत तथा सिँचाई मन्त्री दीपक खड्कालाई सहभागी हुन स्वीकृति दिने निर्णय गरेको पनि सरकारका प्रवक्ता सञ्चार तथा सूचना प्रविधिमन्त्री गुरुङले जानकारी दिनुभयो ।
पत्रकारले सोधेको प्रश्नको जवाफमा मन्त्री गुरुङले पहिले संविधान संशोधनका लागि मुद्दा पहिचान गर्ने र सबै पक्षको सल्लाह र सुझावका आधारमा साझा धारणा बनाएर संशोधनको प्रक्रिया अगाडि बढाउने बताउनुभयो ।
अहिलेको मुख्य एजेण्डा मुलुकको शासन प्रणालीलाई व्यवस्थित गर्ने, सुशासन कायम गर्ने र अर्थतन्त्रलाई बलियो बनाउनेतर्फ केन्द्रित रहेको पनि मन्त्री गुरुङले बताउनुभयो ।
मन्त्रिपरिषद् बैठकका १९ निर्णय (सूचीसहित)
प्रतिक्रिया राख्नुहोस्