खराब मौसमका कारण नेपालगञ्ज विमानस्थलबाट हुने सबै उडान अवरुद्ध

नेपालगञ्ज । नेपालगञ्जबाट आजका लागि तय भएका सबै उडान अवरुद्ध भएका छन् । बाक्लो शीतलहर तथा कुहिरोका कारण आज हुने सबै हवाई उडान अवरुद्ध भएको नेपालगञ्ज विमानस्थलले जनाएको छ ।

नेपालगञ्जबाट काठमाडौँका लागि श्री एयरलाइन्सले चार, बुद्ध एयरलाइन्सले चार र यति एयरलाइन्सले दुई वटा हवाईजहाज नियमित उडान भर्दछन् । भिजिबिलिटी कम भएका कारण उडान अवरुद्ध भएका हुन् ।

आज पहाडी जिल्लामा हुने उडान पनि अवरुद्ध भएका छन् । उडान अवरुद्ध हुँदा यात्रु अलपत्र परेका छन् । केही दिन यता चलेको शीतलहरका कारण यहाँबाट हुने उडान अनियमित र अवरुद्ध समेत हुँदै आएको छ ।