मौलिक संस्कृतिलाईआयआर्जन सँग जोड्ने सरकारको योजना:  मुख्यमन्त्री आचार्य

दाङ । लुम्बिनी प्रदेश सरकारले माघे संक्रान्ति तथा माघ पर्वको अवसरमा माघ मिलन कार्यक्रम सम्पन्न गरेको छ । आन्तरिक मामिला तथा कानून मन्त्रालयले प्रदेश राजधानी परिसर राप्ती उपत्यका देउखुरीमा बुधवार माघ मिलन कार्यक्रमको आयोजना गरेको हो ।

थारु, मगर, नेवार लगायतका समुदायको सांस्कृतिक पहिचान झल्कने झाँकी सहित प्रदेश सरकारले भव्य रुपमा माघ मिलन कार्यक्रम गरेको छ । थारु समुदायको रैथाने खानाहरूको प्रबद्र्धन गरिएको छ । ढिक्रि, खरिया, बरिया, फुलौरी लगायतका परिकारहरू समेत पस्किएको छ ।

लुम्बिनी प्रदेशका मुख्यमन्त्री चेतनारायण आचार्यले माघ मिलन कार्यक्रमको उद्घाटन गर्दै मौलिक कला संस्कृतिको संरक्षण सँगै त्यसलाई आय आर्जन सँग जोड्ने गरी प्रदेश सरकारले कार्यक्रम बनाएको बताउनु भयो ।‘माघे संक्रान्ति तथा माघ साझा पर्व हो । लुम्बिनी प्रदेशमा भावनात्मक सम्बन्ध बलियो बनाउन र थप एकता कायम गर्न मद्दत गरेको छ’मुख्यमन्त्री आचार्यले भन्नुभयो,‘मौलिक कला संस्कृतिलाई पर्यटन सँग जोड्न जरुरी छ । कला संस्कृतिलाई पर्वमा मात्रै सीमित गर्ने होइन, अन्य दिनमा पनि संस्कृतिको संरक्षण र प्रवर्द्धन गर्न जरुरी छ ।’

प्रदेश सरकारले थारु तथा मगर समुदायको कला संस्कृतिको संरक्षण गर्दै आयआर्जन बढाउन होमस्टे सञ्चालनकालागि सिप हस्तान्तरण गर्ने बताउनु भयो ।‘हाम्रा कला संस्कृतिलाई जोगाउँदै समुदायको आर्थिक आम्दानी सँग जोड्न जरुरी छ । यसकालागि प्रदेश सरकारले होमस्टे सञ्चालनकालागि बजेटको व्यवस्था गरेको छ’उहाँले भन्नुभयो,‘समुदायको आर्थिक सशक्तिकरण नगर्दा सम्म समृद्धि र विकासको चाहना पुरा हुन सक्दैन । यस अर्थमा कला संस्कृतिको संरक्षण र प्रबद्र्धन जरुरी छ ।’

प्रदेशको विविधता आन्तरिक तथा बाह्य पर्यटकलाई आकर्षण गर्ने खालको भएकाले त्यसको प्रचारप्रसार गर्दै पर्यटक आवागमनलाई बढाउन जोड दिनुभयो । प्रदेश सरकारले मौलिक पर्वहरूलाई सम्मान गर्दै प्रबद्र्धनको नीति लिएको र सोही अनुरुप प्रदेश स्थापना भए देखी माघ पर्वलाई भव्य रुपमा आयोजना गरिँदै आएको जानकारी दिनुभयो । आन्तरिक मामिला तथा कानून मन्त्री आदेशकुमार अग्रवालको अध्यक्षता तथा मुख्यमन्त्री चेतनारायण आचार्यको प्रमुख आतिथ्यतामा सम्पन्न भएका थियो ।

कार्यक्रमलाई सम्बोधन गर्दै सभामुख तुलाराम घर्तीमगरले माघ साझा पर्व भएकाले यसले मौलिक कला संस्कृति संरक्षण गर्न महत्वपूर्ण भूमिका खेलेको बताउनु भयो ।

‘पहिचानहरूको संरक्षण गर्न जरुरी छ । यसकालागि सभ्यता जोगाउन आवश्यक छ’उहाँले भन्नुभयो,‘प्रदेश सरकार स्थापना भए देखी मौलिक कला संस्कृतिको संरक्षण गर्न तल्लीन छ ।’ नेकपा माओवादी केन्द्रका प्रमुख सचेतक इन्द्रजीत थारुले माघ पर्वले एक आपसमा भावनात्मक सम्बन्ध बलियो बनाउन भूमिका खेलेको बताउनु भयो ।‘मौलिक सांस्कृतिकले समुदायमा खुसि र उत्सव कायम गरेको छ उहाँले भन्नुभयो,‘कला संस्कृतिको संरक्षण गर्दै अव आर्थिक गतिविधिलाई बढाउन जरुरी छ ।’ प्रदेश सभा सदस्य निमा गिरीले मौलिक कला संस्कृतिको संवर्द्धन सबैको साझा मुद्दा बनेको बताउनु भयो ।

आन्तरिक मामिला तथा कानून मन्त्रालयका सचिव रेखा कँडेलको स्वागत मन्तव्य बाट सुरु भएको कार्यक्रमको सहजिकरण वरिष्ठ शाखा अधिकृत गंगाधर पाण्डेले गर्नु भएको थियो । प्रदेश सरकारले माघ पर्वलाई सम्मान गर्दै आज सार्वजनिक बिदा समेत दिएको छ ।