खुदुनाबारी गोल्डकपको उपाधि मेचीनगरलाई
झापा । झापाको अर्जुनधारा नगरपालिकामा सम्पन्न चौथो खुदुनाबारी गोल्डकपको उपाधि मेचीनगर नगरपालिकाले जितेको छ ।
अर्जुनधारा–३ को कैदले प्राकृतिक रङ्गशालामा आज भएको फाइनल खेलमा शिवसताक्षी नगरपालिकालाई २–० गोल अन्तरले हराउँदै मेचीनगरले उपाधि जितेको हो ।
मेचीनगरलाई जित दिलाउन लक्षु थापाले दुवै गोल गरे । उनले खेलको २६ औँ र ३६ औँ मिनेटमा गोल गरेका थिए ।
गोल्डकप विजेता मेचीनगरले नगद १ लाख ११ हजार २ सय ११ रुपैयाँसहित ट्रफी, मेडल र प्रमाणपत्र पुरस्कार पायो । उपविजेता बनेको शिवसताक्षीले नगद ५५ हजार ६ सय ५५ रुपैयाँ ,ट्रफी, मेडल र प्रमाणपत्रमा चित्त बुझायो ।
शिवसताक्षीका निकेश श्रेष्ठ प्रतियोगिताको सर्वोत्कृष्ट खेलाडी बने । उनले नगद १० हजार र ट्रफी पाए । मेचीनगरका विशाल दर्जी उत्कृष्ट डिफेन्डर बन्दा मेचीनगरकै सनम भुजेल सर्वाधिक गोलकर्ता बने । उनले प्रतियोगितामा ७ गोल गरेका थिए ।
त्यस्तै मेचीनगरका युवराज पुरी उत्कृष्ट गोलकिपर बन्दा मेचीनगरका टिम कोच ससेन्द्र धिमालले बेष्ट कोचको पुरस्कार हात पारे ।
त्यस्तै आयोजक टिमका सौरव विक प्रतियोगिताको उदीयमान खेलाडी घोषित भए । उनीहरू सबैले जनही नगद ७ हजार र ट्रफी पाए ।
फाइनल खेलको नायक बनेका लक्षु थापाले बेस्ट प्लेयर अफ दि फाइनलको पुरस्कार पाए । उनले नगद ५ हजार र ट्रफी हात पारे ।
विजेता, उपविजेता र विधागत रुपमा उत्कृष्ट खेलाडीहरूलाई अर्जुनधाराका नगर प्रमुख बलदेवसिंह गोम्देन तामाङ, शिवसताक्षीका नगर प्रमुख मेघाहाङ थोप्रा, झापा जिल्ला खेलकुद विकास समितिका अध्यक्ष प्रशान्त भण्डारी, अर्जुनधारा १ का वडाध्यक्ष उपेन्द्र बस्नेत, अर्जुनधारा २ का वडाध्यक्ष नरेन्द्रकुमार श्रेष्ठ, प्रतियोगिताका खेल संयोजक धनबहादुर तामाङ, आर्थिक संयोजक ढुण्डीराज गौतमलगायतले पुरस्कार वितरण गर्नुभएको थियो ।
प्रतिनिधिसभाका सभामुख देवराज घिमिरेको प्रमुख आतिथ्यमा सम्पन्न भएको चौथो खुदुनाबारी गोल्डकपको समापन समारोहमा खेल क्षेत्र र खुदुनाबारीको समग्र विकासका लागि योगदान दिने मदनविक्रम नेम्वाङ, कर्मेन्द्र बिक्रम नेम्वाङ, राजेन्द्रबहादुर गौतम, गोविन्दराज काफ्ले र युवराज महतलाई सम्मान गरिएको थियो ।
गोल्ड कपलाई अर्जुनधारा नगरपालिकाको १, २ र ३ नम्बर वडाले संयुक्त रुपमा आयोजना गरेका थिए ।
प्रतिक्रिया राख्नुहोस्