पर्सा क्षेत्र नं.४ (क) मा काँग्रेसका चौधरी विजयी

वीरगंज । प्रदेश सभा तर्फ पर्सामा फेरि काँग्रेसले अर्को सिट जितेको छ । पर्साको क्षेत्र नम्बर ४ (क) बाट नेपाली कांग्रेसका शङ्कर प्रसाद चौधरी निर्वाचित हुनु भएको छ । 

पाँच दलीय सत्ता गठबन्धनको समर्थन पाउनु भएका चौधरीले निकटतम प्रतिद्वन्द्वी एमाले जसपा गठबन्धनका जयप्रकाश थारुलाई पराजित गर्दै निर्वाचित हुनु भएको हो । 

चौधरीले नेकपा एमाले पर्साका अध्यक्ष रहनु भएका जय प्रकाश थारुलाई २ हजार ३४ मतको अन्तरले पराजित गर्नु भएको हो । 

चौधरीले ११ हजार ५ सय ८५ मत ल्याएर निर्वाचित हुनु भएको छ भने थारुले ९ हजार ५ सय ५१ मत प्राप्त गर्नु भएको छ ।

यही क्षेत्रका निवर्तमान प्रदेश सभा सदस्यसमेत रहेका चौधरी पुनः दोहोरिनु भएको छ । चौधरीको जित सँगै अहिले सम्म पर्सामा नेपाली काँग्रेसले २ वटा प्रदेश सभा सदस्य जितेको छ । 

यसअघि आजै पर्साको क्षेत्र नम्बर २ (क) मा नेपाली काँग्रेसकै श्याम पटेल निर्वाचित हुनु भएको छ । चौधरी निर्वाचित भए पनि यसको आधिकारिक घोषणा गर्न बाँकी रहेको पर्साका मुख्य निर्वाचन अधिकृत विनोद कुमार पोखरेलले बताउनुभयो ।