जुम्ला प्रदेश (ख)मा त्रिपक्षीय कडा प्रतिस्पर्धा, कसले मार्ला बाजी ?

जुम्ला । आसन्न मंसिर ४ गते हुने प्रतिनिधि सभा र प्रदेश सभा सदस्य निर्वाचनका लागि जुम्ला निर्वाचन क्षेत्र (ख)मा त्रिपक्षीय कडा प्रतिस्पर्धा हुने भएको छ । गठबन्धनका तर्फबाट कर्णाली प्रदेशका बहालवाला भौतिक पूर्वाधार तथा सहकारी विकास मन्त्री पदम रोकाया, नेकपा एमालेबाट टेकराज पछाई र स्वतन्त्रबाट धनबहादुर बस्नेतबीच कडा प्रतिस्पर्धा हुने भएको हो । 

दोस्रो पटक हुन लागेको प्रदेशसभा निर्वाचनका लागि उम्मेदवारहरू चुनावी एजेण्डा सहित मतदाता भेटघाटका लागि गाउँगाउँमा पुगेका छन् । महत्त्वाकाङ्क्षी योजना सुनाउँदै उम्मेदवारहरू मतदाता रिझाउन व्यस्त छन् । 

धनबहादुर बस्नेत नेपाली काँग्रेसले आफूलाई अन्याय गरेको भन्दै पार्टीमा विद्रोह गरेर स्वतन्त्र उम्मेदवारी दिएका हुन् । त्यस्तै मन्त्री पदम रोकायालाई तीन दलीय सत्ता गठबन्धनको ठुलो साथ छ । नेकपा एकीकृत समाजवादी पार्टीबाट उम्मेदवार बनेका रोकाया गठबन्धनको बहुमत पाएर जित्नेमा ढुक्क छन् ।

यता नेकपा एमालेका टेकराज पछाई समुदायमा राम्रो व्यक्तित्व भएका उम्मेदवार हुन् । उनी गठबन्धनको कच्ची धागो चुँडाएरै विजयी हुने दाउमा छन् । एमाले प्रतिको बढ्दो जनलहरले जीत सुनिश्चित रहेको उहाँको दाबी छ । 

बलियो जनमतका साथ चुनावी मैदानमा उत्रिएका तीनै जनाले उम्मेदवार चुनाव जित्ने आ–आफ्नै दाबी गरिरहेका छन् ।  मन्त्री रोकायाले तीन दलीय गठबन्धन भएको कारण आफू सहजै जितको नजिक रहेको बताउनु भएको छ । उहाँले  बाढीपहिरोले निर्वाचन क्षेत्र (ख)मा पुराएको क्षतिको व्यवस्थापन गरी पुनः जस्ताको तस्तै बनाउने मुद्दालाई प्राथमिकता दिएका छन्  ।  

२०७४ सालको निर्वाचनमा कांग्रेसका भीमनिधि हमाललाई पराजित गरेर प्रदेशसभा सदस्यमा निर्वाचित भएका रोकाया त्यतिबेला एमालेको साथ थियो । पछि उहाँ नेकपा एसमा प्रवेश गरी मन्त्री भएका थिए । 

आफु मन्त्री हुँदा समग्र जुम्ला सहित आफ्नो निर्वाचन क्षेत्रको उल्लेखीय विकास गरेको र सत्ता गठबन्धनका कांग्रेस र माओवादीको मतबाट आफू विजयी हुनेमा कुनै शङ्का नरहेको उहाँको दाबी छ । 

यता एमालेका उम्मेदवार टेकराज पछाई युवा रोजगारी, उद्यमशीलता र उत्पादन वृद्धिका एजेण्डा लिएर घरदैलो गरिरहेका छन् । पछाई एमालेका प्रभावकारी एवम् पहुँचयोग्य नेताका रुपमा परिचित छन् । लामो समय काठमाडौँमा रहेर विद्यार्थी राजनीति गरेका उहाँ जनताको माग र आवश्यकता अनुसार गठबन्धन नभएकोले आफूलाई विजयी गराउने तर्क दिनुहुन्छ । सिंजा सभ्यताको विकास र संरक्षण तथा युग सुहाउँदो विकासका लागि निर्वाचन क्षेत्र (ख) मा एमालेको विकल्प अरू नरहेको समेत उहाँको भनाई छ । 

गठबन्धनका साझा उम्मेदवार पदम रोकाया तथा एमालेका प्रभावकारी नेता टेकराज पछाई दुईवटा हेवीवेट उम्मेदवारलाई चुनौती दिन स्वतन्त्र उम्मेदवार धन बहादुर बस्नेत चुनावी मैदानमा उत्रिएका छन् । ४८ वर्षदेखि काँग्रेसको राजनीतिमा होमिएर बस्नेतलाई हाल सम्म पार्टीले कुनै उपयुक्त अवसर नदिएपछि काँग्रेसबाट विद्रोह गरेर स्वतन्त्र उम्मेदवार बनेका उहाँ आफूलाई स्पष्ट मत प्राप्त हुने बताउनुहुन्छ । 

गठबन्धनको उम्मेदवार मन्त्री रोकाया भए पनि कांग्रेस र माओवादीको उम्मेदवार नहुँदा ती पार्टीका समर्थकको मत आफूलाई आउने उहाँको दाबी छ । गठबन्धन आफैमा गिजोलिएको छ । धेरै मतदाता रुष्ट छन् । उहाँले भन्नुभयो,“मतदाता नयाँ अनुहार हेर्न चाहिरहेका छन् । मैले पार्टीको विरोध गरेको छैन । केही व्यक्तिका कारण अवसर नपाउँदा उम्मेदवारी दिएको हुँ । त्यसकारण काँग्रेस भित्रका पनि इमान्दार कार्यकर्ताले मलाई भोट दिने छन् ।”

यसरी तीन उम्मेदवारले आफु जित्ने दाबी गरिरहँदा जनताले कसलाई अनुमोदन गर्लान् त ? त्यो नतिजा हेर्न बाँकी छ । मतदाताले नयाँ अनुहार हेर्न चाहानु, गठबन्धनका तर्फबाट पदम रोकाया उम्मेदवारमा दोहोरिनु तथा पछाई र बस्नेत नयाँ अनुहार चुनावी मैदानमा उत्रिनु जुम्ला निर्वाचन क्षेत्र (ख)को चुनाव रोचक कडा प्रतिस्पर्धा हुने देखिएको छ

मतदाता सङ्ख्यालाई हेर्दा जुम्लामा जम्मा ६८ हजार ६ सय ३८ हुँदा निर्वाचन क्षेत्र (ख) मा ३१ हजार ८ सय ५५ मतदाता छन् ।  जसमध्ये १५ हजार ३३ महिला र १६ हजार ८ सय २२ पुरुष मतदाता छन् । निर्वाचन क्षेत्र (ख)मा तिला,हिमा, सिंजा र कनकासुन्दरी . गाउँपालिका पर्छन् ।  स्थानीय तहको निर्वाचनमा तिला र सिञ्जामा माओवादी तथा हिमा र कनकासुन्दरीमा काँग्रेसले जितेको छ ।