बागलुङको जैमिनिमा राष्ट्रिय जनमोर्चाका पुन विजयी

बागलुङ।बागलुङको जैमिनि नगरपालिकाको मेयरमा सत्ता गठबन्धनको तर्फबाट राष्ट्रिय जनमोर्चाका नर बहादुर पुन भारीमतले निर्वाचित हुनुभएको छ। पुनले निकटतम प्रतिद्वन्द्वी नेकपा एमालेका लीला रानालाई ५ हजार ८ सय ७२ मतान्तरले हराउँदै नगरप्रमुखमा निर्वाचित हुनुभएको हो। पुनले ८ हजार ७ सय ५५ मत प्राप्त गर्नुभएको छ भने रानाले २ हजार ८ सय ७३ मत प्राप्त गर्नुभएको छ।

उपप्रमुखमा पनि गठबन्धनकै नेपाली काँग्रेसका हरिहर शर्मा निर्वाचित हुनुभएको छ। उहाँले ६ हजार ५ सय ३७ मतान्तरले उपप्रमुखमा निर्वाचित भएका हुन्। शर्माले ९ हजार १ सय ७३ मत प्राप्त गरेका छन् भने नेकपा एमालेका उषा पौडेलले २ हजार ६ सय ३६ मत प्राप्त गर्नुभएको छ। नगरपालिकामा नेपाली काँग्रेसले वडा नं. १ कुश्मीसेरा, २ दमेक, ३ बिनामारे, ७ जैदी र ८ छिस्ती गरि पाँच वटा वडा अध्यक्ष जित हासिल गरेको छ भने माओवादी केन्द्रले वडा नं. ३ दमेक र वडा नं. ६ अर्जेवा जित हासिल गरेको छ। त्यस्तै राष्ट्रिय जनमोर्चाले वडा नं. १० राङखानी र नेकपा एमालेले वडा नं. ९ मा जित हासिल गरेको छ।

बागलुङमा अझै बागलुङ नगरपालिका, काठेखोला गाउँपालिका र बडिगाड गाउँपालिकाको पूर्ण नतिजा आउन बाँकी छ। मतगणना भइरहेका पालिकामा सत्ता गठबन्धन अग्रस्थानमा छ भने नेकपा एमालेले पछ्याइरहेको छ।