नेपाली कांग्रेस इलामको क्षेत्रिय सभापतिमा राई र इदिङ्गो निर्वाचित

इलाम  । नेपाली काँग्रेसको १४ औ महाधिवेशनमा इलामका दुई वटै प्रतिनिधिसभा निर्वाचन क्षेत्रमा संस्थापन पक्षका तर्फबाट सभापति निर्वाचित भएका छन् । आज बिहान सम्पन्न भएको मतगणना अनुसार  क्षेत्र १ को सभापतिमा शमशेर राई र क्षेत्र २ को सभापतिमा डिकेन्द्र इदिङ्गो  निर्वाचित भएका छन् । 

राई रोङ गाउँपालिका अध्यक्ष  हुन भने इदिङ्गो माङ्सेबुङ गाउँपालिका अध्यक्ष हुन ।  राईले २ सय ४७ मत ल्याएर विजयी बन्नु भएको हो । राईका निकटतम प्रतिस्पर्धी भीष्म प्रधानले २ सय १४ मत प्राप्त गर्नु भएको छ । क्षेत्र २ को निर्वाचित सभापति इदिङ्गोले ४ सय ३२ मत प्राप्त गर्नु भयो । इदिङ्गोको निकटतम प्रतिस्पर्धी नुतनदेव दुलालले २ सय ९८ मत प्राप्त गर्नु भयो । दुवैजना निर्वाचित सभापति जिल्ला सभापतिका प्रत्याशी भेषराज आचार्य निकट मानिन्छन् ।  

क्षेत्र नम्बर १ को सचिव द्वयमा राजकुमार लिम्बू (सेरेङ) र यामन लामा विजयी भएका छन् भने  सहसचिव द्वयमा प्रज्न्वल भट्टराई र बुद्धराज लिम्बू निर्वाचित भएका हुन । क्षेत्र नम्बर २ को सचिव द्वयमा बबिन धनकुमार राई र सुवास घिमिरे तथा सहसचिव द्वयमा अम्बिका चौहान र खोम खतिवडा निर्वाचित भएका छन् । निर्वाचन क्षेत्र नम्बर १ मा २६ जना र क्षेत्र २ बाट २५ जना महाधिवेशन प्रतिनिधिमा निर्वाचित भएका छन् ।  
वर्तमान जिल्ला सभापति रहनु भएका  जिल्ला सभापतिका प्रत्याशी हिमालय कर्माचार्य, पूर्व सभापति तथा अर्का प्रत्याशी केशव थापा र सभापतिकै प्रत्याशी रहेका भेषराज आचार्य महाधिवेशन प्रतिनिधि  निर्वाचित भएका छन् । 

जिल्ला सभापतिमा उम्मेदवारी दिन महाधिवेशन प्रतिनिधि निर्वाचित हुनु पर्ने प्रावधान छ । इलाम काँग्रेसको जिल्ला नेतृत्वका लागि आगामी  १० गते अधिवेशन हुने निश्चित भएको छ ।