नेपाल संम्वतलाई मौलिक संम्वतका रूपमा प्रवर्द्धन गर्नुपर्छ : अध्यक्ष बिजुक्छे

काठमाडौँ । नेपाल मजदुर किसान पार्टीका अध्यक्ष नारायणमान बिजुक्छेले मुलुकको मौलिक संम्वतको रूपमा नेपाल संम्वतलाई प्रवर्द्धन गर्नुपर्ने बताउनुभएको छ ।

नवसमाज निर्माण पुस्तकालयले आफ्नो ४०औँ वार्षिकोत्सवका अवसरमा आज चन्द्रागिरि नगरपालिका–१२ बलम्बुमा आयोजना गरेको नेपाल संम्वतको भित्तेपात्रो विमोचन कार्यक्रममा उहाँले यस संवत्लाई राष्ट्रिय तथा अन्तर्राष्ट्रिय तहमा प्रवर्द्धन गर्न सकेमा देशको गौरव बढ्ने विश्वास व्यक्त गर्नुभयो । अध्यक्ष बिजुक्छेले सबै जाति, समुदायका भेषभूषा तथा संस्कृतिले मुलुकमा सामाजिक सद्भाव र एकता कायम राख्न सहयोग पुर्‍याउने उल्लेख गर्नुभयो ।  

चन्द्रागिरि नगरपालिकाका प्रमुख घनश्याम गिरीले राष्ट्रिय संवत्का रूपमा स्थापित नेपाल संवत्का विशेषतालाई प्रचार गर्नुपर्नेमा जोड दिनुभयो । पुस्तकालयका अध्यक्ष सुनिल महर्जनले चन्द्रागिरि तथा त्यस आसपास क्षेत्रका स्थानीयवासीलाई विभिन्न सूचना तथा ज्ञान अभिवृद्धि गराउन पुस्तकालयको भूमिका रहेको बताउनुभयो । 

उक्त पुस्तकालयमा आर्थिक अभावका कारण खोजमूलक कृति सङ्कलन गर्न नसकेको सो अवसरमा महर्जनले जानकारी गराउनुभयो । कार्यक्रममा नेवारी संस्कृतिलाई समेटेर सङ्कलन गरिएका विभिन्न तस्बिरका प्रदर्शनी गरिनुका साथै प्रतियोगिताका उत्कृष्टलाई पुरस्कृत गरिएको थियो । रासस