मदिरा सेवन गरी विवाद गरेको आरोपमा वडाअध्यक्ष पक्राउ

अछाम। मदिरा सेवन गरी विवाद गरेको आरोपमा अछाममा वडा अध्यक्षलाई प्रहरीले नियन्त्रणमा लिएको छ ।

जिल्लाको पञ्चदेवल विनायक नगरपालिका वडा नम्बर ८ बारलाका वडा अध्य​क्ष तारा प्रसाद खनाललाई प्रहरीले नियन्त्रणमा लिएको हो ।

बुधवार राति पञ्चदेवल विनायक नगरपालिकाको केन्द्र रहेको विनायक बजारस्थित एक होटेलमा वडा अध्य​क्ष खनालले मदिरा सेवन गरी होटेलका सञ्चालकमाथि हातपात गर्नुका साथै महिलामाथि अभद्र व्यवहार गरेको गुनासोका आधारमा प्रहरीले उहाँलाई बुधवार राति नै नियन्त्रणमा लिएको बताएको छ ।

वडा अध्यक्ष खनाललाई बुधवार राति नै जिल्ला प्रहरी कार्यालयमा लगिएको र अहिले विवाद समाधानका लागी दुवै पक्ष बिच छलफलको तयारी भइरहेको नगरपालिकाले जनाएको छ ।

जिल्ला प्रहरी कार्यालय अछामका सूचना अधिकारी जनक बोहराका अनुसार वडा अध्यक्ष खनालले मदिरा सेवन गरी अभद्र व्यवहार गरेको गुनासोका आधारमा उहाँलाई प्रहरीले नियन्त्रणमा लिएको हो ।