गगन थापाले काँग्रेसमा निरन्तरताको क्रमभङ्ग गरे, अब देशको नेतृत्व गर्ने बाटोमा हिँड्नुस् : संयोजक दाहाल

काठमाडौँ । नेपाल  कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले नेपाली कांग्रेसका सभापति गगनकुमार थापाले पार्टीको नेतृत्वमा निरन्तरताको क्रमभङ्ग गरेर नयाँ इतिहासतर्फ अघि बढाएको बताउनुभएको छ।

नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै संयोजक दाहालले गगन थापालाई बधाई दिँदै उहाँको नेतृत्व गर्ने क्षमता आफूले यसअघि नै देखेको बताउनुभयो । उहाँले आफूले प्रधानमन्त्री हुँदा थापा स्वास्थ्य मन्त्री रहेको स्मरण गर्दै थापाको राजनीतिक यात्राप्रति आफू खुसी रहेको बताउनुभयो । “गगनजीलाई बधाई छ। गगनजीमा नेतृत्व गर्ने क्षमता छ। अन्ततः यो देशको नेतृत्व गर्ने अवस्था आउन सक्छ भनेको थिएँ। आज त्यही देखिरहेको छु” उहाँले भन्नुभयो।

विषम राजनीतिक परिस्थितिका बीच थापा कांग्रेसको नेतृत्वमा आउनु आफैँमा ‘क्रमभङ्ग’ भएको उहाँको भनाइ छ। “यो क्रमभङ्ग हो। निरन्तरतामा क्रमभङ्ग गरेर तपाईँ पार्टीको नेतृत्वमा आउनुभएको छ”, उहाँले भन्नुभयो ।

संयोजक दाहालले काँग्रेसभित्र अझै छुटेका नेता तथा समूहलाई समेत जोडेर अघि बढ्न थापालाई आग्रह गर्नुभयो । पार्टीलाई थप एकताबद्ध बनाएर अघि बढाउनुपर्ने भन्दै उहाँले कांग्रेसको नयाँ नेतृत्वले सबैलाई समेट्ने प्रयास गर्नुपर्ने बताउनुभयो ।

उहाँले गगन थापा अब पार्टीको नेतृत्वमा मात्रै सीमित नरही देशकै नेतृत्व गर्ने बाटोमा अघि बढ्नुपर्ने भन्नुहुँदै त्यसका लागि आफ्नो साथ र सहयोग रहने बताउनुभयो । “अहिले तपाईँ देशको नेतृत्व गर्ने बाटोमा हिँड्नु होला, हामी साथ दिन तयार छौँ”, उहाँले भन्नुभयो ।

उहाँले मुलुकमा गणतन्त्र र लोकतन्त्र समेत जोखिममा पर्न सक्ने अवस्था रहेको भन्दै राजनीतिक दलहरू सचेत हुनुपर्ने बताउनुभयो  । लोकतान्त्रिक गणतन्त्रलाई संस्थागत गर्न प्रमुख राजनीतिक शक्तिहरूबीच सहकार्य आवश्यक रहेको उहाँको भनाइ छ।

शान्ति सम्झौताका केही काम अझै पूरा हुन बाँकी रहेको उल्लेख गर्दै संयोजक दाहालले ती काम समयमै टुङ्ग्याउनुपर्ने बताउनुभयो । शान्ति प्रक्रियाका बाँकी विषय समाधान हुन नसके मुलुक फेरि द्वन्द्वतर्फ जान सक्ने जोखिम रहेको उहाँको भनाइ थियो। “शान्ति सम्झौताका केही चिज अझै टुङ्ग्याउन बाँकी छ। यो टुङ्गिएन भने देश फेरि अर्को द्वन्द्वमा जान सक्छ। यो पनि गगन थापाले पूरा गर्नुपर्ने छ”, उहाँले भन्नुभयो।

मुलुकको समृद्धि र विकासका लागि सबै राजनीतिक शक्ति मिलेर अघि बढ्नुपर्ने बताउँदै संयोजक दाहालले नयाँ नेतृत्वले देशलाई समृद्धिको दिशामा अघि बढाउने विश्वास व्यक्त गर्नुभयो । “सबै मिलेर समृद्ध नेपालको विकास गर्न सबै मिलेर जानेछौँ भन्ने विश्वास छ”, उहाँले भन्नुभयो ।