छ महिनादेखि बन्द बाँकेको क्यान्सर अस्पतालको लिन्याक मेसिन सञ्चालनमा आउने
बाँके । बाँकेको खजुरास्थित सुशील कोइराला प्रखर क्यान्सर अस्पतालमा करिब छ महिनादेखि बन्द रहेको लिनियर एक्सेलेरेटर अर्थात् लिन्याक मेसिन सोमबारदेखि सञ्चालनमा आउने भएको छ।
अस्पताल प्रशासनको पहलपछि मेसिन आपूर्ति गर्ने कम्पनीले प्राविधिक पठाएर लिन्याक र ब्रेकीथेरापी मेसिन सञ्चालनमा ल्याएको हो।
अस्पतालका रेडियोलोजी विभाग प्रमुख डा. मुकेश यादवका अनुसार सोमबारदेखि रेडियोथेरापी र ब्रेकीथेरापी सेवा नियमित हुनेछ।
मेसिन बन्द हुँदा दैनिक २५ भन्दा बढी बिरामी प्रभावित भएका थिए। सेवा रोकिएपछि बाँकेसहित लुम्बिनी, कर्णाली र सुदूरपश्चिमका बिरामी उपचारका लागि भारतका विभिन्न अस्पताल जान बाध्य भएका थिए।
मेसिन खरिदसम्बन्धी विवादका कारण आपूर्तिकर्ताले मर्मत तथा प्राविधिक सेवा रोकेपछि सेवा प्रभावित भएको अस्पतालले जनाएको छ। खरिद सम्झौता र भन्सार कागजातमा मेसिनको एचएस कोड तथा कन्ट्री अफ ओरिजिन फरक देखिएपछि आपूर्तिकर्ताको बाँकी भुक्तानी रोकिएको बताइएको छ।
रु. २७ करोडभन्दा बढी मूल्यमा खरिद गरिएको मेसिनको ६० प्रतिशत रकम भुक्तानी भइसकेको र करिब आठ लाख छ हजार अमेरिकी डलर बराबरको रकम भुक्तानी हुन बाँकी रहेको अस्पतालले जनाएको छ।
मेसिन सञ्चालनमा आएसँगै क्यान्सरका बिरामीलाई रेडियोथेरापी सेवा लिन बाहिर जानुपर्ने बाध्यता कम हुने अस्पतालले जनाएको छ।
प्रतिक्रिया राख्नुहोस्