१३ वटा राष्ट्रद्वारा समुद्री जलमार्गमा रक्षा गठबन्धन गर्ने घोषणा

रियाद (साउदी अरेबिया)। साउदी अरेबिया लगायतका अन्य ले बाब एल-मन्डेब स्ट्रेट, लाल सागर र एडनको खाडीलगायत महत्वपूर्ण जलमार्गमा आवागमन गर्ने व्यावसायिक जहाजको सुरक्षा गर्न एक रक्षात्मक नौसेना गठबन्धन स्थापना गर्न सहमत भएको घोषणा गरेका छन् ।

साउदी अरबविरुद्ध नौसैनिक नाकाबन्दी गर्दै इरान समर्थित हुथी मिलिसियाले निरन्तर समुद्री अवरोध गर्दै आएको समयको बिचमा यो घोषण आएको हो । स्ट्रेट अफ होर्मुजको बन्दबाट उत्पन्न पारवहन अवरोधका कारण सुरक्षा खतरा बढेपछि विश्वव्यापी ऊर्जा सुरक्षाको डर बढेको र कच्चा तेलको मूल्य बढेर हालसम्मकै उच्च स्थानमा पुगेको जनाइएको छ । 

साउदी अरबको रक्षा मन्त्रालयले गठबन्धनका संस्थापक सदस्य राष्ट्रलाई साउदी अरब, कुवेत, बहराइन, कतार, पाकिस्तान, टर्की, इजिप्ट, जोर्डन, यमन, बङ्गलादेश, नाइजेरिया, सुडान, जिबूती र सोमालियाका रूपमा सूचीबद्ध गरेको जनाएको छ । यो सम्झौतालाई रियादमा आयोजित सैन्य सम्मेलनमा औपचारिक रुप दिइएको थियो । जसमा युरोपेली सङ्घका प्रतिनिधिसँगै ४३ देशका रक्षा प्रमुख र प्रतिनिधि भेला भएका थिए । 

सहभागी अधिकारीहरूले व्यक्तिगत रूपमा र भिडियो कन्फरेन्समार्फत आयोजित सत्रमा प्रस्तावित विषयमा मूल्याङ्कन गरेको जनाइएको छ । साउदी अरेबियाले संस्थापक राष्ट्रको रूपमा काम गर्ने र आफ्नो क्षेत्रमा केन्द्रीय मुख्यालय स्थापना गर्ने तयारी गरिएको जनाएको छ । प्रस्तावित संगठनात्मक ढाँचाले संयुक्त कमान्ड संरचना, परिचालन नियन्त्रण केन्द्र र गठबन्धन प्रयासलाई समन्वय गर्न सचिवालय स्थापना गर्ने उल्लेख गरिएको छ । 

यसबाहेक, साउदी अरबको रक्षा मन्त्रालयले थप देशले आ-आफ्नो घरेलु स्वीकृति प्रक्रिया पूरा गरेपछि  यस सुरक्षा गठबन्धनमा सहभागी हुन सक्ने बताएको छ । यस साझेदारीलाई “विशुद्ध रक्षात्मक पहल” को रूपमा विकास गर्दै, रक्षा अधिकारीले प्रत्येक सदस्य राष्ट्रको सार्वभौमिकतालाई सम्मान गर्दै अन्तर्राष्ट्रिय कानुनी मापदण्डको कडाईका साथ पालना गर्ने आश्वासन दिँदै गठबन्धनले कुनै विशेष राज्य वा संस्थालाई लक्षित नगरेको कुरामा जोड दिनुभएको छ । रासस/एएनआई